يوم الجمعة بتحلى اللمة على الأكل.. علشان كده حبينا نشاركك اللمة الحلوة دي.. ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا.. ونقدّم لك كل يوم جمعة اقتراح لعزومة مكوّنة من العصير والطبق الرئيسي وطبق السلطة وطبق الحلو.. علشان تنوّعي لعيلتك.. وتبهريهم بأكلاتك الجامدة.. تعالي بقى نشوف هنعمل إيه النهارده.. ******************* عصير منعش في الصيف عصير البطيخ المقادير: 4 كوب ماء كيلو إلا ربع بطيخ منزوع البذر ومقطع لمكعبات معلقة صغيرة فانيليا الثلج الطريقة: 1- حطي كل المكونات في الخلاط، واضربيهم كويس لغاية ما المكونات كلها تمتزج ببعضها كويس. 2- بعد كده حطي العصير في الثلاجة علشان يبرد، وعند التقديم حطيه في الكاسات مع الثلج وقدميه. ******************* طبق سلطة مليان بالفيتامينات سلطة الحمص المقادير: 1/4 كيلو حمص مسلوق بصل أخضر مفروم ناعم 4 ثمرة طماطم مقطعة قطع صغيرة 2 ثمرة خيار مقطع قطع صغيرة 2 ثمرة فلفل رومي مقطع قطع صغيرة معلقتين نعناع مفروم عصير 2 ليمونة 2 فص ثوم مفرومين ملح وفلفل أسود زيت زيتون الطريقة: 1- صفي الحمص كويس من المية بتاعته وحطيه في وعاء وضيفي عليه الخضار المقطع والنعناع والليمون. 2- وبعد كده تبليهم بالملح والفلفل وزيت الزيتون وقلبي كل المكونات مع بعضها وقدميها.. وبالهنا والشفا. ****************** طبق شوربة في منتهى الجمال شوربة كريمة الجبنة والبطاطس المقادير: 3 ثمرات بطاطس متوسطة 2 ثمرة بصل متوسطة 4/1 كوب زبدة 4 أكواب إلا ربع شوربة 3/2 كوب لبن كوب جبنة شيدر مبشورة ملح وفلفل الطريقة: 1- قشري البطاطس والبصل وقطعيهم لمكعبات. 2- سخني الزبدة في إناء على النار وبعد كده ضيفي عليها البطاطس والبصل وشوحيهم مع بعض على نار متوسطة لغاية ما لونهم يبقى ذهبي فاتح، وبعد كده ضيفي الشوربة. 3- بعد ما الشوربة تغلي قللي النار شوية وسيبي الخليط يغلي لمدة 15 دقيقة أو لغاية ما تحسي إن الخضار استوى كويس، وبعد كده ضيفي اللبن، وسيبي الخليط على النار لمدة دقيقتين. 4- اضربي الشوربة في الخلاط لغاية ما كل المكونات تختلط وتتجانس مع بعضها، وبعد كده رجعي الشوربة تاني على النار وسيبيها تسخن كويس، وبعد كده ضيفي الجبنة المبشورة على الشوربة، وشيلي الشوربة فوراً من على النار أول ما تحطي الجبنة. 5- بعد كده حطي الملح والفلفل وقلبي الشوربة وحطيها في أطباق التقديم، وممكن تزيني الشوربة بالبقدونس المفروم.. وبالهنا والشفا. ******************* ممكن تقدمي معاها أرز أبيض أو بطاطس محمرة شرائح اللحم بصوص الفلفل الأحمر المقادير: 4 شرائح من اللحم الإستيك 2 ثمرة فلفل أحمر رومي مقطع شرائح 3 ثمرات طماطم 1/4 معلقة صغيرة كمون معلقة صغيرة كزبرة ناشفة معلقة صغيرة شطة فلفل أسود 2 معلقة صغيرة نعناع مفروم فص ثوم الطريقة: 1- اشوي الفلفل الرومي الأحمر والطماطم على النار. 2- بعدما ما الطماطم تبرد قشريها، واضربيها في الخلاط كويس، وبعد كده ضيفي الكمون والكزبرة الناشفة والشطة و الفلفل الأسود والنعناع والثوم واخلطيهم كويس مع بعض، وبعد كده قلبيهم مع شرائح الفلفل الأحمر المشوي. 3- هاتي طاسة وحطيها على النار واشوي فيها شرائح اللحم على النار لغاية ما تحسي إن اللحمة استوت وبعد كده حطي الصلصة اللي جهزتيها في طبق التقديم وغطيها بشرائح اللحم المشوية وقدميها وممكن تقدمي معاها أرز أبيض أو بطاطس محمرة.. وبالهنا والشفا. ******************** طبق لذيذ ومناسب مع جو الصيف بودنج النسكافيه المقادير: 300 جرام بسكويت سادة 3 معالق كبيرة نسكافيه٬ مذوّبة في نصف كوب ماء 350 جرام قشطة 2 معلقة كبيرة كاكاو كوب سكر ناعم كوب ونصف كريمة لباني مخفوقة الطريقة: 1- اغمسي البسكويت في النسكافيه. 2- هاتي طبق ورصي في قاعدته طبقة من البسكويت المطعم بالنسكافيه. 3- اخلطي القشطة مع الكاكاو والسكر الناعم كويس لغاية ما الخليط يبقى ناعم أوي، وبعد كده حطي نصف كمية الخليط ده فوق البسكويت اللي في الطبق، وبعد كده حطي نصف كمية الكريمة المخفوقة. 4- كرري نفس الخطوات مرة تانية، يعني حطي طبقة من البسكويت وعليها طبقة من القشطة وعليها طبقة الكريمة. 5- حطي البودنج في الثلاجة لمدّة 3 ساعات، وبعد كده قدميه بارد.. وبالهنا والشفا. وفي النهاية نتمنى إن عزومة النهارده تكون عجبتِك.. وتجربي كل الوصفات وتبعتِ تقولي لنا على النتيجة.. وكمان لو عندك وصفة حلوة عايزة تشتركي بها معانا.. ممكن تبعتيها لنا على لينك... "ورينا شطارتِك" وإلى اللقاء في العزومة الجاية،،،
