يوم الجمعة بتحلى اللمة على الأكل.. علشان كده حبينا نشاركك اللمة الحلوة دي.. ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا.. ونقدّم لك كل يوم جمعة اقتراح لعزومة مكوّنة من العصير والطبق الرئيسي وطبق السلطة وطبق الحلو.. علشان تنوّعي لعيلتك.. وتبهريهم بأكلاتك الجامدة.. تعالي بقى نشوف هنعمل إيه النهارده.. *********************** ممكن تزيّني الكوبايات بشرائح الموز عصير الموز باللبن واللوز المقادير: 1/4 كيلو موز 3 أكواب لبن حليب بارد 1/4 كوب لوز أبيض منزوع القشور ومبشور 3 ملاعق سكر عصير ليمونة الطريقة: اخلطي كل المقادير دي مع بعضها واضربيهم كلهم مع بعضهم في الخلاط الكهربائي، وبعد كده حطيهم في كوبايات العصير. ********************** طبق سلطة جديد ولذيذ سلطة الفلفل المشوي المقادير: ثمرة فلفل أحمر متوسطة الحجم ثمرة فلفل أخضر متوسطة الحجم 1/4 معلقة صغيرة فلفل أسود ثمرة فلفل أصفر متوسطة الحجم نص حزمة بقدونس "للتزيين" 4 فصوص ثوم مفرومين الطريقة: 1- هاتي الفلفل واغسليه كويس، وبعد كده نشّفيه واشويه على نار متوسطة الحرارة مع تقليبه من جميع الجوانب. 2- بعد ما يتشوي الفلفل سيبيه لغاية ما يبرد، وبعد كده قشريه، وشيلي البذر منه، وبعد كده قطعيه إلى قطع صغيرة. 3- هاتي طبق السلطة وحطي فيه الفلفل المقطع وتبليه بالملح والفلفل الأسود والثوم، وممكن إنك تزيني الطبق بالبقدونس. *********************** طبق شوربة في منتهى الجمال شوربة الجزر النهارده هنستفيد من الجزر في عمل طبق شوربة في منتهى الجمال ودي الطريقة... المقادير: 1/2 كيلو جزر 2 حبة بطاطس كبيرة معلقة كبيرة بقدونس مفروم معلقة كبيرة زبد شوربة فراخ أو لحمة أو مرقة دجاج + كوب مية بصلة مقطعة قطعاً صغيرة الطريقة: 1- هاتي الجزر والبطاطس واغسيلهم كويس وقشريهم، وبعد كده قطعيهم إلى قطع صغيرة. 2- هاتي حلة وحطي فيها الزبدة، وحمّري فيه البصل والجزر والبطاطس على نار منخفضة لمدة 15 دقيقة مع التقليب المستمرّ. 3- بعد مرور الربع ساعة ضيفي إليهم الشوربة والملح والفلفل، وسيبيهم لغاية ما يغلوا وتلاقي الجزر والبطاطس بقت لينة. بعد كده اطفي البوتجاز، وسييبها لغاية ما تبرد، وبعد كده اضربيهم مع بعض في الخلاط. 4- بعد ما تضربيهم في الخلاط هاتي الحلة وحطيهم على النار، وسخنيهم مرة كمان، وبعد كده صبيهم في أطباق الشوربة، وزيني الطبق بالبقدونس المفروم، وعلى فكرة ممكن لو لاقتي قوام الشوربة سميك ممكن إنك تضيفي المية السخنة أثناء الغليان في المرة الثانية. *********************** طريقة جديدة ومميزة للمكرونة مكرونة اسباجيتي بالفراخ المشوية المقادير: 1/2 كيلو مكرونة اسباجيتي 1/2 كيلو صدور فراخ مشوية ومقطع شرائح بالطول فلفل ألوان مقطع شرائح بالطول 3 ملاعق كبيرة زيت الزيتون 3 فصوص ثوم مهروس 1/2 كوب جوز مدقوق 1/4 كوب جبنة تشيدر مبشورة مقادير الصلصة: 3 معالق كبيرة ريحان مجفف 2 معلقة كبيرة زيت الزيتون فص ثوم مهروس 1/2 كوب جبنة بارميزان 1/2 كوب زيت ذرة الطريقة: 1- اسلقي المكرونة في مية سخنة مضاف ليها الملح ونص معلقة زيت، بعد ما المكرونة تتسلق كويس اغسليها بمية باردة، وسيبيها في المصفاة. 2- بعد كده ابدئي في تحضير الصلصة بإنك تحطي كل مكوناتها في الخلاط وتضربيهم مع بعض كويس. 3- هاتي صينية وسخني فيها زيت الزيتون، وحمري الثوم ثم اضيفي ليها الفراخ مع الصلصة المعدة سابقاً وقلبيهم مع بعض لمدة 5 دقايق، وبعد كده ضيفي المكرونة ونصف كمية الجوز، واتركيها لمدة 4 دقائق على النار. 4- شيلي المكرونة من على النار وحطيها في طبق التقديم وزينيها بباقي الجوز والجبنة المبشورة. *********************** مهلبية قمر الدين مهلبية قمر الدين المقادير: 1/2 لفة قمر الدين كوب سكر 6 أكواب مية كوب نشا كوب من اللوز المقشّر (أو أي مكسرات موجودة) الطريقة: 1- انقعي قمر الدين لمدة ليلة كاملة في المية. 2- بعد ما تلاقي قمر الدين ذاب في المية هاتي حلة وصبيه فيها، وضيفي إليه كوب مية وسكر مع التقليب، وحطي حلة قمر الدين دي على النار مع التقليب المستمر. 3- أثناء غليان قمر الدين على النار هاتي كوب مية وحطي فيها النشا وقلبيهم كويس. 4- بعد ما قمر الدين يغلي ضيفي إليه النشا تدريجياً مع التقليب المستمر، وخدي بالك إن في الوقت ده تخلي النار هادية علشان تقدري تتحكمي فيه، وسيبيه على النار لمدة نص ساعة مع التقليب المستمر علشان ما يلزقش. 5- بعد ما تلاقي قمر الدين بقى سميك شيليه من على النار وصبيه في أطباق صغيرة واستني عليه لما يبرد، وبعد كده زينيه باللوز المقشر أو أي مكسرات عندك ودخليه التلاجة وطلعي منه عند التقديم.
وفي النهاية نتمنى إن عزومة النهارده تكون عجبتِك.. وتجربي كل الوصفات وتبعتِ تقولي لنا على النتيجة.. وكمان لو عندك وصفة حلوة عايزة تشتركي بها معانا.. ممكن تبعتيها لنا على لينك... "ورينا شطارتِك" وإلى اللقاء في العزومة الجاية،،،
