التاريخ لايرحم .. وأيضا الجغرافيا ؛ كله الى زوال وتبقى الأفعال – وأحيانا بعض الأسماء وحروف الجر - ؛ فعبد الناصر كان زعيما حقيقيا التف حوله الشعب العربى بأكمله ؛ والتف عليه الصهاينة ؛ فخرج المصريون يطالبونه بعدم التنحى والبقاء فى الحكم دون تعبئة من الحزب الوطنى – طبعا لأنه لم يكن موجودا ولم يترأس لجنة سياساته جيمى الصغير - ؛ والسادات كان رئيسا حقيقيا وداهية سياسية ؛ جانبه التوفيق فى بعض قراراته – رغم أن توفيق بالذات كان أصدق أصدقائه ؛ أما المخلوع مبارك فقد كان ... وكان .... ؛ وكان ياما كان يا برادعى يا أخوان : شلة منتفعين جثموا على صدر العباد ؛ وحكموا مصر بالحديد والصاجات ؛ والظلم زاد واختفى الزواد ؛ وشلة الأنس نهبت الأرض وهتكت العرض والطول كمان ؛ وطبال قصير - شبر واقطع – ركب وبرطع فى البلاد ؛ أصل صاحبه ابن الكبير ؛ والكبير مالوش كبير ؛ والغفير أصبح وزير؛ والحرامى بقاله شنه ؛ والجنيه مابقاله رنة ولاحتى ميسدكول ؛ سرطنوا كل الآراضى ؛ وفطارنا بق ميه من مجارى ؛ وغدانا لقمة فاضية اشبع يا خالى ؛ والعشا طعمية ناشفة وسوس وفول ؛ والدخان الأسود عمانا ؛ والكسيح شاطنا ورمانا ؛ والهوا عمره ماجانا يوم " نظيف " ؛ والشعب كله بيصحى بدرى عشان يدورعلى الرغيف ؛ والهموم زادت وغطت ؛ والديون ع الفقرا حطت ؛ والبطالة والخلاعة والحصانة والعبارة فى الشيكارة ؛ وكل حاجة عاوزالها حاجة ؛ وغرقنا يا ابنى فى الزبالة ؛ والشباب أصبح عوالة ؛ والجهول هوه اللى سايق ؛ والقواد هوه الشريف ؛ والعجيب .. ان القروض من الفروض ؛ يلهفوا قرش الغلابة ؛ وانسى يابا ؛ أى صوت يعلا عليهم يبقى عبره ؛ التهمة جاهزة ؛ بيعكروا صفو النظام ؛ والنظام سوس وضارب فى العظام ؛ والعظام متكسرة ؛ كله تمام ؛ والواد هايحكم واللى يتكلم هايندم ؛ واللى هايهلل هايكسب ؛ واللى يسكت هانسيبه ينعم بالأمان ؛ شعب حكموه الديابة ؛ والعصابة لابسه سروال البجاحة والتناحة ؛ والشعب مكسور الجناح ؛ محصور يا عينى ما بين هموم العيشة وعصايه السفاح ؛ كرباج ورا .. كرباج يمين .. كرباج شمال ؛ كربجونا وزنزنونا وبهدلونا وشحتونا وسرطنونا وزوروا صوتنا كمان ؛ النيل بكى ؛ صوته اشتكى ؛ ولا حد سامع للكلام ؛ الجوع صرخ ؛ والكيل طفح ؛ والشعب هب على النظام ؛ 30سنة حاكم وظالم ؛ 30سنة والشعب صابر ؛ يمكن فى يوم يحس بيه ؛ لكن جناب الحاكم سد ودنه بالعناد ؛ " ارحل بقى " : مافيش رحيل ؛ " ارحل ياعم " : اسكت ياواد ؛ اضرب يا عادلى فى الشباب ؛ سقط القناع ؛ الشعب قام ؛ يبقى خلاص خلص الكلام ؛ سقط النظام .. سقط النظام ؛ كان ياما كان ؛ وكان ... وكان ... ؛ انتهى زمن السكات.