بقلم نادية حسن ايه اللى يضايق جوزى وبخليه يشتكى لطوب الارض انى خنقاه ؟؟؟!!! ايه اللى عملته لما كل ما انزل وسط البلد اعدى عليه فى مكتبه !!! وايه اللىينرفزه لما اشوف من وراه مين اللى كلمه على الموبيل والرسايل اللى بتجيله ,,, او انى ادور على صاحب النمره اللى من غير اسم ايه اللى يضايقه ,,, وايه الخنقه فى كده !!! وايه العجيب لما كان فى مؤتمر فى اسكندريه وبالصدفه لقانى فى اللوبى و اتخانق معايا والمصيبه انه مصدقنيش لما قلت له انى كنت زهقانه فاخدت العربيه ونزلت سقتها وفوجئت بنفسى فى اسكندريه!!! بتحصل يعنى انا مش حاله غريبه !! وايه القضيه لما اكلمه كل يوم و التانى وااقوله انى فى المستشفى ويجى يلاقى مفيش حاجه ؟؟؟ من حقى اخاف على جوزى وخصوصا انه احلى منى زى ما الكل بيقول وبصراحه كمان عينه زايغه..!! وطالما اخترنى انا من وسط كل اللى عرفهم يبقى اكيد مش هايرتبط بحد... ده اللى كانت مايسه صاحبتى من النادى دايما تقوله لى ,,, لكن اللى حرق دمى انى مقدرتش اعرف ايه المكالمه اللى كانت بتيجى له ويقعد يرغى بالساعات وبصراحه استخدمت كل الوسائل الممكنه لغايه ما عرفت صاحبة التليفون وبالادب هددتها انها لو مبعدتش عن جوزى انى هابلغ عنها شرطة الاداب !!! المهم انها اختفت وبصراحه خفت ان تظهر واحده تانيه ,, وخصوصا انه من النوع اللى مش بيعرف يكسف حد ... واللى زود خوفى انى لازم اسافر الاسماعيليه لان ماما تعبانه وحاولت اتهرب من السفريه لكن فشلت ومبقتش عارفه اعمل ايه ؟؟؟؟ الا ان مايسه صاحبتى اقترحت على اننا نشغله باى حاجه لغاية لما ارجع ولقيتها بتقولى انتى بتثقى فى ولا للأه ؟؟؟ ايه الكلام ده انتى معرفة من شهور ومشفتش منك الا كل خير قالت لى : خلاص سافرى واستريحى وانا هاتصل به يوميا وكده تضمنى انه لا هايخرج ولا يبص هنا ولا هنا وعلى الافل تبقى عارفه هو مع مين ... بصراحه الفكره عجبتنى وخصوصا ان مايسه مش الستايل بتاعه ولا هى بتحب شكل جوزى خاالص ...وسافرت لماما وانا مطمنه وخصوصا انى كل ما اتكلم على التليفون الارضى الاقيه فى البيت ده غير ان مايسه كانت بتدينى التقارير اول بأول ورجعت من الاسماعيليه بعد 3 ايام ولقيت جوزى خروجه قل وبصراحه مبقتش عارفه اشكر مايسه ازاى ,,, وقالت لى مايسه انتى جيتى خلاص بفى اوقف موضوع التليفونات...و اتحايلت عليها تكلمه شويه عشان ما يكشفش العمليه ويعرف انى انا اللى مرتباها ويعند وتبقى بدل الواحده اتنين ؟؟؟!! ووافقت مايسه وبقيت اعرف ميعاد التليفون فاسيبه وانا ببقول لنفسى اهو كده اريح من الجرى والتنطيط وراه فى كل حته ..وبقيت مرعوبه لو عرف ان مايسه دى من طرفى وفى يوم لقيت مايسه بتقولى اظن انا عملت اللى على وزياده ... قلت لها الصراحه دى خدمة العمر ده اتلم خالص والحمد لله انه ميعرفش اانك صاحبتى ... لقيتها بتقولى وهى سعيده لا وهايتلم اكتر فى ظرف يومين وهاينسى موضوع التليفون ده خالص !!! معقوله يا مايسه !! انتى قدرتى تعملى اللى فشلت انا فيه ازاى عملتى ايه ؟؟ لقيتها بتقولى وبكل بساطه اصلنا قررنا نتجوز...!!! بعد بكره ومتزعليش منى احنا لغاية كده معرفتنا انتهت....!!!
