بقلم حسام عباس فيديو مدير أمن البحيرة يسب الشعب المصرى تعالوا نخرج من عباية "أنا مش عاوز فلان وزير الداخلية" و لا مش عاجبني علان رئيس وزراء, من النهارده إحنا المفروض نحكم على المسؤولين بأعمالهم, مش بإنتماءاتهم, صح؟ يعني ما عنديش مشكلة مع الفريق أحمد شفيق إنه كان " او لا زال" عضو في الحزب الوطني, و لا عندي مشكلة مع اللواء محمود وجدي إنه أقسم بالولاء لمبارك عند تعيينه, لكن عندي مشكلة كبيرة جدا مع الناتج إللي بشوفه كمواطن منهم, و مشكلة أكبر لتوافقهم مع نبض الشارع, يعني إيه؟ يعني أكثر ما أذكر من لقاءات الفريق أحمد شفيق الصحفية قوله: أهم ما يشغلنا الآن هو عودة الأمن إلى الشارع المصري, و لقد تكررت هذة الجملة على مسامعي منذ اليوم الأول لتوليه رئاسة مجلس الوزراء, يعني بقالنا أكتر من 35 يوم بنسمع نفس الكلام, ده غير قرارات و تصريحات اللواء محمود وجدي التي لم تخلو من إضافات كوميدية عن حركة تنقلات لقيادات الداخلية من هنا لهنا, و زيادة مرتبات, و مميزات, و غيرها, و حسبتها كنوع من جبر الخواطر للظباط بعد أن قاموا بقنص الثوار و إفقاد أكثر من 1000 إنسان بصره سواء جزئيا أو كليا بخراطيش الرصاص المطاطي ماشي, و ماله, ماهم برده إللي حصل فيهم مش شوية, و يا عالم نفسيتهم عاملة إيه دلوقت, وسمعت عن نظريات تقارن حال الشرطة الآن بحال الجيش في 67 لكن بصراحة مع شوية فروق طفيفة, يعني الجيش أيامها كان بيحارب العدو, و الشرطة في الثورة كانت بتحارب الشعب, الجيش أيامها ما حاربش أصلا, و الشرطة في الثورة حاربت حتى نفاذ الذخيرة تماما لكن فرضية إن الداخلية هتاخد 6 سنين عشان ترجع الشارع المصري تاني, شكلها هي دي الحاجة المشتركة إللي هتحصل فعلا, ليه؟ لإن ما فيش أي بوادر مرئية للمواطن في الشارع لعودة الشرطة, و السبب على ما أظن بيفكرني بمسرحية متزوجون, لما سمير غانم كان بيقول لشيرين: هو أبوكي فين؟ بيستهبل؟ آه, بيستهبل, مش إنت إتجوزت البنت غصب عنه؟ إشرب بقى يعني من الآخر, وزير الداخلية يأبى إلا أن يربي الشعب, بنفس الصلف و الغطرسة لسابقه, يخرج علينا في حديث مع أحد كبار منافقي التليفزيون المصري, مؤكدا أن من قنص الثوار "أجانب" و أن خطة الصد للتظاهرات لم تكن "محكمة" و أنه لا يوجد معتقلون إطلاقا في وزارة الداخلية و أمن الدولة, و غيرها من الإسطوانات التي يستحي أقل رتبة في الداخلية أن يرددها بين أصدقائه على المقهى, بل و يخرج علينا أحد مديري الأمن "بتاع إحنا أسيادهم" قائلا جملة في قمة الروعة و التي أكاد أجزم أن العديد لم ينتبه لها: كان مخطط إنهم يستولوا على السلطة و على البلد, بس الحمد لله ما كملش غير إن الباشا طلع على قناة أجنبية و قال بعدها إن أسيادهم كان قصدي بيها خادم القوم سيدهم, و قال إن الكلام كان موجه للبلطجية و الخارجين عن القانون, لكن أحب أقوله, للأسف لأ يا سيدي, إسمع كلامك تاني و إنت هتلاقي في نفس الجملة: إحنا أسيادهم و إحنا الأمن و إحنا الأمان و إحنا إللي حاميينهم, إلا إذا كان ده إعتراف صريح منك يا سيدي بحماية البلطجية و اللصوص, فلو ده قصدك يبقى معاك حق, إحنا نستاهل ضرب الجزم إننا بندفع مرتب أمثالك من ضرائبنا و عشان إللي مش فاكر, أهوه الباشا و إسمع و ركز http://www.youtube.com/watch?v=aaVLTW0XHL4 و الغريب إن في نفس الجمعة إللي فاتت 25 فبراير, قامت الداخلية بنفس السيناريو الغريب في المنصورة, و قبلها برده في الوادي الجديد و ساعتها كانت برده تحت قيادة اللواء محمود وجدي وسمعنا الإستغاثات من المواطنين هناك على التلفاز طيب و بعدين يا سيادة الفريق و يا سيادة اللواء, و أخصكم بالكلام لأنكم الإثنين من وعدتماني بعودة الأمن للشارع المصري بأقصى سرعة, إيه النظام؟ قولولي عاوزين إيه؟ إيه المطلوب مننا كشعب عشان يرضى علينا أسيادنا؟ لإن الواضح إنكم برده ما فهمتوش الدرس, و للأسف أيوه باقول الدرس, لو الوضع ده إستمر أكتر من كدا, ببساطة إحنا هنعرف نحمي نفسنا كويس جداااا, و على فكرة في وسطنا ناس كتير مش لاقية شغل من زمان,و أجمل أيام حياتهم قضوها في اللجان الشعبية, و ماعندهمش مشكلة إطلاقا في السهر طول الليل, و إترفع عنهم برقع الحياء من أيام اللجان الشعبية لما كانوا بيوقفوا مدير مباحث منطقتهم و يطلبوا منه الكارنيه و يفتشوا عربيته, يعني مش هنلاقي مشكلة إننا نرجع الأيام دي أسرع مما تتخيلوا, لكن ساعتها هيكون رجوعكم إنتوا إللي بقى صعب جداااا إنت بتهددنا يابني؟ أعوذ بالله ياسيادة الفريق و يا سيادة اللواء, أنا بانصحكم و الله, خلوا إيقاعكم أسرع, و ودنكم على نبض الشارع, ما تغلطوش غلطة إللي قبلكم, و نصيحتي ليكم بتتلخص في الآتي مزق ذفاترك القديمة كلها "مع الإعتذار لأمير الشعراء" وشيلوا القيادات الهرمة, و اطلعوا بقيادات شابة, فاهمة يعني إيه خدمة المواطن, و لسا ذممهم لم تلوث, يمكن يكونوا أصغر في السن, لكن هم دول إللي هيعرفوا يتعاملوا مع الإيقاع الحالي للشعب المصري, و إعدلوا في الأجور, و سيبكم من قصص البدلات إللي بتوصل لبعض اللواءات لأكتر من مليون جنيه في الشهر, عارفين يعني إيه مليون جنيه في الشهر؟ يعني زيادة ألف جنيه لمرتب ألف ظابط لكن سياسة إشربوا بقى, نهايتها مش هتعجبكم إنتوا, و التاريخ لا ينسى
