بقلم علاء الغندور أطرش 1: انا مش عارف هوه ايه اللى حصل..انا كنت ماشى تايه والهم ساطلنى..الوليه قارفانى فى عيشتى و العيال عايزين فلوس و انا مش عارف اعمل ايه و الحكومه منفّضه ومطنشه و كأننا شعب تانى مالهاش دعوه بينا وقلت اروح اشوف حد جدع سكران يسقينى كاس خمرا عشان تبقى ليله حمرا مع الوليه مراتى و ربنا ياخد حماتى اللى قاعده بتسّخن مراتى عليّا..و مشيت و عديت و جنب الكنيسه خشيت و فجأة لقيت الأنفجار و لقيت الكل طار ..حد مجرم قتل الناس و طار من دماغى الكاس و لقيت نفسى طرت وواقف على شباك و الناس مستغربه.قالوا .ايه اللى طلعه هناك..فى الدور التالت و واقف على الشباك. أطرش2 :سواك؟ سواك ايه يا سيدى..ده وقت سواك؟ انا واقف حنبك عند البلكونه ورجلى طارت لما القنابل طيرونا..انت شايف حد ادامك فى الشباك جوه ؟ أطرش 1: قوة ايه بس هوه انا قادر اصلب طولى ..استنى لما أشوف.. جوه الأوضه راجل مشّغل موسيقى و الصوت عالى اوى وبيرقص مع واحده روسيه وماسك الكاس و لا داريان بالدنيا ديه..س انا متهيألى شفته قبل كده فى الجرايد..باين عليه راجل مهم و متهيألى شفته فى التليفزيون. أطرش 2: تليفون ؟ تليفون ايه يا عم انت؟ هوه انت مش شايفنى ماسك البلكونه بأيدية الأتنين ..يعنى هأتصل بالنجده ازاى..استنى لما اطلب المساعده من الناس اللى جوه الأوضه..دول بيعيطوا و ماسكين التليفون بيطلبوا البوليس و واحده ساجده و بتصلى ويتدعى ربنا ان ينقذ المصابين. أطرش 1 :سردين..سردين ايه بس..ده وقت جوع و أكل..خلينا فى المصيبه اللى احنا فيها عايزين حد ينقذنا أحسن نقع فى الشارع و نموت..يارب استرها و هأبّطل اشرب خمرا أطرش 2 :حمرا..ايه اللى حمرا؟..بالذمه ده وقت هزار..و الا انت شايف ادامك ليله حمرا.. يارب استرها و مش هأخون مراتى تانى و هأبطل اشهد زور. أطرش 1 : مرور..مرور ايه بس يا عم انت ؟هوه المرور هييجى ينظم المرور هنا..همه عارفين ينظموه تحت..عشان يعرفوا ينظموه هنا فوق ؟ أطرش 2:شوق..شوق ايه ياخويا؟ نا عايز حد ييجى ياخدنا و ينقذنا..الحقونا يا ناس..هنقع و نموت..الحقونا يا مسلمين ياللى بتصلوا جوه..تعالوا انقذونا أطرش 1 :سونا..سونه ايه و بتاع ايه؟ انت يا عم الحّبيب..سيب الوليه اللى فى ايدك دى و تعالى انقذنا..ابوس ايدك وطى صوت التسجيل و بطّل بوس وتعال دخلنى جوه عندك و احلف لك انى مش هأفتن لمراتك عليك. أطرش 2 :عينيك..عينيك ايه و رجليك ايه؟انت شايف اللى انا شايفه..الناس مترميه تحت و متقطعه حتت وناس متصابه و كمان جتت و لسه البوليس ماجاش أطرش 1 :متحاش..مين اللى متحاش؟يارب ما يكون الأسعاف هوه اللى متحاش فى زحمة المرورو يجيبوا الأوناش وو ييجوا ينزلونا من هنا وننفد بعمرنا..دا دنا غلبان. أطرش 2 :أنسان..أنسان ايه؟هو لو حد من الحكومه بيعاملنى انى انسان ما كانشى ده بقا حالى ...يارب خد كل ظالم و مفترى وارهابى و خد اللى كان السبب فى تجويع عيالى واللى قتلوا اخواتى الأقباط ..واكسر شوكة مراتى المفترية.. يارب خد الحكومه اللى فى بالى.
