كثيرون هيستغربوا الاسم يعنى ايه قعدة ستات وليه مش قعده وخلاص ! بس الحقيقه الناظر لشكل مجتمعنا الان سيلحظ ان معظم القعدات بقت ستات فى النادى ،السينما، الكافيهات كلهم ستات فى ستات !!!! ؟ ربما لانشغال الرجل او يمكن عدم وجوده واحتمال يكون الاستغناء عن وجودهم !!!! المهم فى النهايه ان القعده بقت ستات فى ستات فيهم المحجبه واللى من غير والمدخنه والمشيشه، كمان حتى المظهر بقى رجالى، يمكن بيعوضوا نقص تواجد الرجل ( بس بينى وبينكم مفيش حاجه تغنى عن الرجل اصل انا من ارباب المدرسه القديمه ظل رجل ولا ظل حيطه وده عامل خلاف جامد اوى مع صحباتى ) نرجع لقعدتنا مش قادره افتكر اتكونت امتى ولا ازاى لكن هى غالبا فيها 3 عناصر اساسيه انا وفطومه اللى هى فاطمه وهبه ... وتتوافد علينا بقيه الستات اللى تحكى واللى تشكى واللى تنتقدنا ،،، وكلهم يمشوا ونفضل احنا . طبعا بعد 25 يناير اتغيرت الحوارات واصبحنا كلنا نفهم فى السياسه ولنا اكثر من رؤيه ولكم ان تتخيلوا كيف تكون الخلافات النسائيه من حده وتمسك بالرأى حقيقه الامر انها لاتختلف عن خلافتنا حول افضليه الارز الابيض او الارز ابو شعريه!!!! وعند الخلافات تتساوى حامله الدكتوراه مع حامله المشنه ؟!!! ومرت الشهور وتغيرت الجلسات والاراء والقعدات وبدأنا نعود مره اخرى لنفس الحكايات والحوارات الممله والمتكرره فلان وفلانه والموضه وبرامج التلفزيون و اخرتها ايه !!!!؟ الى ان حدث ما ارجعنا لحوارتنا الثوريه مره اخرى ..... حينما كنا نجلس فى حاله من الكسل والاسترخاء فى النادى وفوجئنا بصوت نعرفه وان كانت ملامحه مختفيه وراء نقاب "السلام عليكم ازيكم يا عفاريت اروح واغيب وانتم فى نفس المكان" ( وراحت شده كرسى وقاعده ) احنا عارفين الصوت كويس بس مش متأكدين معقوله انتى هاله صح ولا انا غلطانه ( ده انا الى بقول ) ردت هبه هاله ايه انتى مجنونه هاله استحاله تلبس نقاب يعنى حقيقى ربنا يهدى بس ازاى ؟!!!! وابتسمت وانابقول بعد ما اتاكدنا انها هاله لما رفعت النقاب بسرعه خاطفه لنتأكد من انها هى ..." لا ده مفيش غير هاله اللى تعمل كده، فاكرين ايام الجامعه لما كانت هوجه الشيوعيه وكانت معجبه بياسر فجأه تحولت بقدره قادر للحليف الاول لستالين ولينين ومظاهرات وندوات لدرجه انها كانت عضو فعال فالحزب لغايه ما ياسر ارتبط بهيام الصيرفى ودخلت هاله فى اكتئاب طويل وكنا كلنا معاها. وخففت من حده كلامى وانا بقول "على فكره ياهاله انا مقصدش حاجه خالص بس الشىء بالشىء يذكر انك تملكى من القدرات كتير" . وجاء ردها وبمنتهى الهدوء "عادى ايه المشكله انى اقتنع بفكره واتحمس لها ولما احس بفشل تطبيقها اتراجع ده قمه التحضر ؟؟؟ ولا ايه" ويبدو ان هبه لم يعجبها الرد الدبلوماسى المصطنع "احتمال تكونى صح ولو انى متغاظه لانى مش شايفه معالم وشك لكن مش مشكله لو انتى مبسوطه كده احنا مش مهم، بس تصورى انا مش عارفه ازاى انتى تحمستى للحزب الوطنى وكنتى فى اكثر من لجنه من لجانه انا حتى شفتك فى التلفزيون ؟؟؟ ومن شده حماسك انا كنت قربت اصدق ان الحزب الوطنى ده طاقه القدر واتفتحت على مصر واننا جاحدين ؟؟؟!!!" وبنفس الصوت الهادى وان كنت لمحت تحرك فالنقاب يدل على عصبيه اسفله ( انا قررت التحق بالمباحث لفهم مايدور وراء النقاب )" بصى يا هبه طبعا انا مش مطالبه انى اشرح لك ايدلوجيه الفكر اللى كان فى الحزب الوطنى واليات وفاعلايات الحراك الديناميكى داخل الحزب واللى اسفرت عن تجارب تنمويه هائله و......و......و" كلمات جوفاء بلهاء لاتغنى عن عطش او تسمن من جوع وسرحت فى مكان اخر الى ان افقت على جمله "لكن اكيد الواحد لما بيكتشف زيف وفشل التجربه لابد ان يتراجع وهو ده قمه التحضر ؟؟!!!" ودون ان تنتظر منا تساؤلات واستفسارات "سيبكم من اللى فات انا فى اللى جاى انا جايه ااقولكم ان الحمد والشكر لله ربنا انعم على بالهدايه عقابلكم يا بنات !!!"( طبعا محاولتش حتى ارد واقول لها ومين قال اننا مش مهديين وسبتها تكمل ) " انا دلوقتى فى الحزب وعندنا خطه تنمويه مختلفه تماما عن كل اللى بتسمعوه وبتشوفوه نقله حضاريه وبسرعه الصاروخ" وبسخريه قلت لها "زى نهضه تركيا كده ؟؟!!" وبهدوء "لا تجربه تركيا من الممكن ان يكون فيها قصور ومش عيب ولا نقص لما الواحد يحس بفشل التجربه انه يتراجع هو ده قمه التحضر." ( واخفيت ضحكى ) "انا مش عايزه اضيع وقت، الحزب معندوش اى مشكله فى الانتماء العقائدى بالمره، فى النهايه كلنا اولاد مصر ويهمنا مصر ونهضتها. هو ده شغلنا الشاغل ولازم نتكاتف عشان ننهض بمصر ونرفعها لصفوف الناهضين والحزب عامل ندوه هنا فى النادى وعايزاكم تكونوا موجودين. انا عارفه ان لكم شعبيه جامده و صداقات ومعارف، انا عايزه اعداد كتيره تحس وتشعر بعظمه النهضه والنهوض وزى ما قلت لكم احنا معندناش اى مشكله فى الانتماء العقائدى." وسالتها "إنتم مين ؟؟؟" "احنا الحزب الناهض الواعد !!!!" وراحت قايمه وفاتحه شنطتها و اخرجت عدد هائل من ايشاربات جميله مرسوم عليها عصافير وحمام ويمام، الصراحه تشكيله من كل انواع الطيور وبصوت مرح ،، "هيبقى شكل الحاضرات حلو اوى فى الايشاربات دى عشان تحسوا بالانتماء للحزب كلنا لازم نطير زى العصافير وننهض بمصر !!!!!!" هنا لم اتمالك نفسى رغم انى كنت قد عاهدت نفسى ودربتها منذ 25 يناير على ظبط النفس وعدم التهور والانفعال الا اننى لم استطع ان اتحمل هذا الاستخفاف بعقولنا " بصى يا عصفوره يا جميله احنا هنطير بس ميعاد طيرانا هو يوم 30 يونيو ومن غير ايشاربات عشان عندنا جناحات قويه ومش عيب اننا نكتشف فشل تجربتنا ونتراجع فى ارائنا"، وقبل ان اكمل الجمله فوجئت بهبه بتكمل العباره وان كان بداخلى احساس انها اصوات ملايين تداخلت لتقول انه مش عيب ابدا ان نكتشف فشل التجربه ونتراجع وان ده هو قمة التحضر !!!!؟؟؟
