كان بالفعل يوم طويل، مقابلات ومناقشات، كنت أقوم بتحليل الإحتياجات التصميمة للمقر الإداري الجديد لأحد العملاء، لم تكن المقابلة الأولى وبالفعل إختلفت كثيرا تلك الزيارة فصرت أرى الواقع من داخله، في الزيارة الأولى كنت أرى مؤسسة تعمل كماكينة لساعة سويسرية يدوية الصنع، كان ذلك الإنطباع الأول، وتغير قليلا بعد أول حديث مع صاحب المؤسسة فرأيته يتكلم ولا يعرف، ربما رأى نماذج جيدة على مدار خبرته لكنه عمليا لا يعرف الكيفية، وفي مقابلاتي مع قيادات المؤسسة إتضحت الرؤية أكثر فأكثر، تذكرت مقال قرأته من يومين لصديقى النصفي الإبتسامة، كان يتحدث عن دولة يديرها الريس حنفي وعن أنتقال المسئولية لإبن حميدو، ليس هذا ما تذكرته بالفعل ولكن توقفت عند مفهوم الدولة، قفزت كعادتي للغة وومضت فكرة ذكر الجزء وقصد الكل أو في حالتي كيف يعبر الجزء عن الكل، فعميلي العزيز يملك مؤسسة ليست بالصغيرة، العديد من الإدارات والأقسام، فروع وشركات شقيقة، إجراءات وتوثيق، ولكن في حقيقة الأمر هي لا تشبه المؤسسات سوى بالمظهر، فهي شيء ما يشبه المؤسسة لكنها تدار بأبسط نظريات الإدارة وهي نظرية الصبي والمعلم... شعرت بأنني أضعت الكثير من الوقت في تلك المقابلات وكان يكفيني تصفح أي جريدة كانت أو العبث بقنوات التلفاز فكنت سأصل لنفس النتيجة، وربما ساورني بعض الضيق من تلك الصورة التي رأيتها أول مرة هزلية بعض الشيء، طلبت من عامل البوفيه (نسكافيه) أسود بدون سكر أو حليب فنظر لي بإستعلاء غريب وقال "بلاك يعني" إبتسمت وقلت له "يا سيدي ما أنت من مصر أيوة يا سيدي بلاك" تسارعت الصور بذهني مشاهد متعددة تقول نفس الجملة، قاطعني عميلي العزيز "إيه يا باشمهندس سرحان في إيه؟" إبتسمت وقلت " عارف سعادتك الفرق بين الجزيرة وشبه الجزيرة؟" عقد حاجبيه بإستغراب، لم أنتظر رداً بل أكملت "شبه الجزيرة هي شيء بيشبه الجزيرة لكن مش جزيرة ناقصها حتة علشان تبقى جزيرة ناقص تنفصل عن الأرض" تقريبا كان يحاول الربط بين موضوع المقابلة وما أقوله وربما فشل أيضا في الربط، فحاولت إيضاح الصورة أكثر فقلت له "أنت ملاحظ إن في تقريبا في كل شارع لجنة مباحث؟" فرد "أه دي بقت حاجة تقرف" أكملت: نظريا المفروض مع كل المباحث دي مايكونش في جرايم أصلا تفتكر الجرايم قلت عن الأول؟ - لا طبعا دي زادت - هي دي نفس الفكرة اللي في الشارع مظاهر أمن لكن مش أمن حاجة كدة شَبه الأمن عقد حواجبه مرة أخرى وكأنه فقد الخيط مرة أخرى حاولت أكثر تقريب الفكرة له مع وصول قهوتي وإنصراف العامل فقلت له : مثلا الولد بتاع البوفية ده بصلي بقرف وإتعوج على اللي جابوني علشان بقوله إسود ماقولتش بلاك تفتكر إنه يعرف إنجليزي أصلا؟ - لا طبعا ده حافظله كلمتين من الموظفين - جميل والموظفين تقدر تقول إنهم يعرفوا إنجليزي كلغة يعني ممكن يروحوا مسرح إنجليزي ويفهموا حاجة؟ - لا أعتقد هايفهموا حاجة مع إنهم كلهم عاوجين لسانهم لكن أنا عارف آخرهم - يعني دي مش لغة دي مظاهر لغة حاجة كدة تشبه اللغة - انت عايز توصل لإيه؟ - ببساطة إنت تقدر تعمل اللي بتعمله في مصر في أي دولة في العالم؟ - يعني إيه؟ - يعني تخلص ورق تضرب أراضي تضرب ورق مشاريع وتاخد قروض تطلع رخصة من غير ما تروح المرور تشتري إمتحانات ولادك من المدرسة يعني تعمل اللي نفسك فيه بغض النظر عن القانون والكلام ده؟ - لا طبعا ما فيش دولة في العالم ممكن تعمل فيها كدة - يعني مصر مش زي أي دولة في العالم لأنها مش دولة دي حاجة تشبه الدولة بتشتغل بنظرية الصبي والمعلم - حلوة نظرية الصبي والمعلم دي المفروض يكون في نظام ده اللي بحاول أعمله في الشركة عندي - الشركة عندك أنت جيت للب الموضوع الشركة عندك فيها نظام ولا حاجة كدة تشبه النظام؟ - لا طبعا أنا أهم حاجة عندي النظام... - بالظبط أهم حاجة عندك النظام فبالتالي بتتابع النظام واللي بيتابعلك النظام العضو المنتدب اللي مسئول عن الشركة صح؟ - تمام بالظبط كدة - طيب العضو المنتدب بيتصرف من دماغه ولا بياخد رأييك في الحاجات الإستراتيجية - لااااااا إستراتيجية إيه ده لامؤخذا بيستأذن مني قبل ما ينام مع مراته - الله ينور على سعادتك هي دي نظرية الصبي والمعلم... رمقني الرجل بنظرة شعرت بعدها أن الزيارة إنتهت وسيأتي عمال النظافة والأمن لإلقائي خارج المبنى وربما تحطيم سيارتي أيضا فحاولت الخروج من المأزق بحنكة... إستجمعت مجموعة كلمات في ذهني رن الهاتف فرد بعصبية "ليه يعني إن شاء الله شغالين عند صفية حلمي؟ ... لا يا أفندي تخصم على قلب أمه... لايحة إيه وزفت إيه أنا صاحب الشركة بقولك تخصم على قلب أمه" أغلق السماعة وقال "لامؤاخذا يا باشمهندس كنا بنقول إيه" إرتسمت على وجهي إبتسامة شقية وقررت تغيير الإستراتيجة في اللحظة الأخيرة قائلا: - كنت بقول لسعادتك أن دي مش مؤسسة دي حاجة كدة تشبه المؤسسة وممكن نعتبرها شَبه المؤسسة القومية لأنها شغالة بنظرية الصبي والمعلم زي شَبه الدولة اللي عايشين فيها" لم أنتظر ردا وأكملت " على العموم إحنا خلصنا النهاردة خلينا على إتصال وهابعتلك الناس بكرة إن شاء الله يرفعوا المقاسات... " ووقفت لأصافحه قبل الإنصراف فقال مصافحا " طيب خلينا نأجل المقاسات لما أشوف رأي مجلس الإدارة!!! شرفت يا باشمهندس محمد" يوميات حمار من مصر