بقلم : أحمد فؤاد نجم منذ 9 دقيقة 57 ثانية قال لي أحمد القزعة بدون مقدمات يا عم أحمد مرسال المحبة ليك قلت له: يا أهلاً بالمراسيل فنظر تجاه عبده شمه وقال: أقول يا غيبوبة؟ فقال عبده شمه جول يا واكل ابوك فقال أحمد القزعة: - غيبوبة عاوز يوجه لك شوال وخايف علي زعلك قلت: - أولا أنا ما اقدرش أزعل من اللي باحبهم واتسعت ابتسامة الرضا علي وجه عبده شمه فقال أحمد القزعة: - بالراحة شوية.. كده وشك حيشقق وضحك عبده شمه وهو يقول: - الله يحرجهم لك يا ملعون.. بس لو ما كانش دمك خفيف وقال أحمد القزعة: - ما تنطق تقول عايز تسأل عمك أحمد عن إيه؟ فقال عبده شمه: - ما تأخذنيش يا عم أحمد في السؤال. انت بتكره حسني مبارك؟ قلت علي الفور: - أعوذ بالله.. أنا يا حاج عبده الحمد لله ما اعرفش أكره لا حسني مبارك ولا غيره. لكن حسني مبارك وأسرته الملعونة كانوا بيكرهوا المصريين وبيتعاملوا معنا بمنتهي الغطرسة والاحتقار فقال أحمد القزعة مؤمنا علي كلامي: - حقه انهي غطرسة وانهي غباوة انا لسة فاكر يا عم أحمد العبارة اللي انت قلتها ونزلت مانشيت لإحدي صحف المعارضة «العب بعيد يا شاطر» قلت: لا يا حاج عبده انا ما كان قصدي اشتمه انا كنت فعلا بانصحه بإخلاص - لكن ربنا يكفيك شر عمي القلب - الصحفي سألني - ماذا تقول لجمال مبارك في موضوع التوريث؟ - قلت له اقول له العب بعيد يا شاطر والحمد لله علي انه ما فهمش وضحك عبده شمه قائلا: والا كان زمانه لسه راكز علي قلونا والعياذ بالله وتساءل أحمد القزعة بمنتهي البراءة - أنا عايز اعرف صحيح هو الكرسي بيعميهم و يطرشهم للدرجة دي؟ قلت: - واكثر من الدرجة دي يا قزعة وكانت امي عليها السلام دايما تقوللي - لما ربنا بيغضب علي عبده بيسلط عليه نفسه وقال عبده شمه: - العياذ بالله من شر النفس الامارة بالسوء وخالف النفس والشيطان واعصهما ولا تطع منهما خصما ولا حكما فأنت نعرف كيد الخصم والحكم
