لقد أوشك رصيدكم على النفاد أيها الإخوان.. لا أتحدث هنا عن رصيدكم فى قلوب المصريين أو غيرهم، فهذا الرصيد انتهى فعلاً وكلنا عارفين الأسباب فأنتم لا تنتمون إلى الإنسانية أبداً بعد هذا الإرهاب والاستغلال الحقير للنساء والأطفال.. ولكنى هنا أتحدث عن رصيدكم من الأموال الذى أوشك أكيد على النفاد بعد كل هذا السفه والإسراف والتبذير الذى جعلكم إخوان الشياطين بحق.. فبعضكم يحفظ الآية الكريمة من القرآن التى يقول فيها المولى عز وجل إن المبذرين كانوا إخوان الشياطين وكان الشيطان لربه كفوراً.. وأنتم تبذرون تبذيراً لا يمكن وصفه لأن الأموال تغدق عليكم وأنتم عارفين منين وليه.. وحكومات نظام مبارك تركت لكم حساباتكم بلا حساب مش عارف ليه وكل يوم بتصرفوا عشرات الملايين من الجنيهات والدولارات واللى من تحت الترابيزة أكثر بكثير من اللى إحنا شايفينه والملايين اللى بتتصرف كل يوم أجوراً للمعتصمين فى رابعة والنهضة بسيطة جداً بالنسبة لما خفى.. والمسيرات الإرهابية فى شوارع مصر وميادينها طبعاً مش ببلاش وأنتم عارفين كويس أن 90% من الناس اللى معتصمين دول مقاطيع ملهمش شغلانة يأكلوا منها عيش إلا الاعتصام معاكم وتحصيل الأجرة يومياً بخلاف الأكل والشرب والجواز البلوشي وال 10% الباقين مضحوك عليهم باسم الدين والشهادة والجنة وشرع الله والمشروع الإسلامى. كل الفلوس دي لا تذكر مقارنة بالفلوس اللى بالهبل اللى بتتصرف على شراء السلاح وتجنيد الإرهابيين اللى انتم بتقولوا عليهم جهاديين ومقارنة بالفلوس اللى بتندفع من تحت لتحت للناس اللى بتأيدكم فى الداخل والخارج وبيحاولوا يشوفوا لكم مخرج وأنتم أكتر ناس عارفين تشتروا الذمم كويس. ولكن يبقى سؤال مهم جداً: هى الفلوس دي ملهاش آخر؟.. أكيد لها بشرط أن يتوقف اللى بيدفع وكلنا عارفين مين وليه زي ما كلنا عارفين ليه أمريكا وأوروبا وتركيا وإسرائيل بيحبوا الإخوان موت وبيدافعوا أوى عن مرسي وإخوانه واليوم الشعب يريد أن يعرف أموال الإخوان منين واللى بيدفع عاوز إيه.. كلنا عارفين بس لازم الحكومة تقول وتفضحهم ويعرف العالم الحر كله إيه التمن اللى الإخوان وعدوا به كل الدفيعة وإزاى.. وليه كان الإخوان بينجحوا فى الانتخابات ويفتخروا أوى بغزوة الصناديق طبعاً لأنهم عارفين كويس إزاى يشتروا أصوات الغلابة بإزازة زيت وكيلو سكر ومفيش مانع من هدمة مستعملة أو جزمة أو كوتشي للعيل أو برشامة للعيان وقوافل طبية عبيطة المهم هم عارفين كويس إزاى يحققوا كل اللى هم عاوزينه بالفلوس، وللأسف نجحوا يقنعوا الحكام فى أمريكا وأوروبا أن الشعب المصري كله فى إيديهم وأن هم يقدروا يعملوا أي حاجة باسم الدين وبالفلوس. وللأسف كمان أن محمد مرسي لما مسك حكم مصر فى السنة الغبرة دى استغل سلطاته وأفرج عن كل الإرهابيين اللى فى السجون واللى إيديهم ملطخة بدم الأبرياء علشان يكونوا أنصاره والجناح العسكرى له يأدب بيهم شعب مصر إذا أفاق وكشف لعبة الإخوان القذرة والأكثر إجراماً فى حق شعب مصر والإنسانية كلها، إن مرسي وجماعته فتحوا أبواب مصر لكل إرهابى مطارد وحرص مرسي وإخوانه علي أن يملأوا أرض سيناء الغالية اللى ارتوت بدماء شهدائنا بمن يسمونهم جهاديين، والحقيقة هم «إرهابيون» واسم الدلع «جهاديون»، وهكذا وجدنا الإخوان يهددون الشعب والجيش بالويل والثبور وعواقب الأمور إذا لم يرجع مرسي من مزبلة التاريخ ليحكم أقدم وأهم وأعظم دولة فى العالم. فكرة للتأمل: عرفتم ليه مرسي كان بيحتفل بالقتلة والإرهابيين بدلاً من أبطال أكتوبر.