كتبت - إيمان محمد: هاجم الفنان أحمد إبراهيم، نقيب الممثليين الدكتور أشرف زكي، وذلك عبر صفحته الرسمية علي موقع التواصل الاجتماعي الشهير "فيسبوك". وكتب "إبراهيم" في تدوينة عبر صفحته قائلًا "ياريت أى حد حكيم من الوسط الفنى يقولى اتصرف إزاى مع الشخص إللى بيدير نقابة المهن التمثيلية النقيب أشرف ذكى ..للمرة العاشرة أو الحداشر حد يرشحنى لشغل والمخرج يقوله مش هقدر اشغل أحمد إبراهيم عشان أشرف ذكى مايزعلش..طب معنى كده بقى أن الأخ النقيب موصى أن إللى هيشغلنى هيزعل منه وطبعا هو زعله وحش وناس كتيييير بلغونى أن اسمى بيترشح وبتشال من الشغل عشان أشرف بيه ذكى حاططنى ف قايمة المغضوب عليهم". وتابع "والسنادى بالفعل أنا مشتغلتش خاااالص واستحملت عشان أنا مش عاوز أوسع الموضوع بيوصلنى تحريضه عليا وبسكت وبتعامل بالقانون ف حقوقى .. لحد دلوقتى لا حس ولا خبر عن شقق النقابه وبقول بكره كل حاجه تتعدل .. شتمنى انا وزمايلى وسط المطبلتيه بتوعه ومارديتش اروحله واردله الشتيمه ف وشه وقلت راجل كبير وعيب تقل منه . بيشتغل هو وعيلته واعضاء المجلس والمطبلتيه بتوعه ف كل المسلسلات وانا وغيرى قاعدين ف بيوتنا بنتفرج وبقول يمكن يشبعوا ويحسوا بينا" . واستكمل "انا كده عدانى العيب وقذح الشخص ده بيمنع عنى الشغل والكل عارف انى موهوب .. طب المطلوب منى اعمل ايه .. انا مش هعرف اطاطيلك لان إللى مربينى راجل ومات ف بيته مش ف السجن ..ناس كتيييير اتدخلت وكلمته وهو رافض حتى مجرد ان حد يكلمه عليا .. ماهو كده بقى الموضوع استقصاد وقطع عيش وانا عندى بيت مفتوح ". وأضاف "اتمنى إللى يعرف شيوخ المهنه زى عادل امام ولا صلاح السعدنى ولا يسرا ولا المنتجين المحترمين يبلغهم ان اشرف ذكى بيضيع مستقبل شاب موهوب .. وانا اقسم بعزه وجلالة الله لحد دلوقتى بتعامل بكل أدب .. انما لما توصل لان شخص يتحكم ف اكل عيشى ورزق ابنى يبقى ياروح مابعدك روح..اللهم بلغت اللهم فاشهد..ياريت إللى بيعزنى يشير كلامى ده على أوسع نطاق عشان رسالتى الاخيره تكون وصلت وابقى عملت إللى عليا بالذوق".
