الباشمهندز خيرت الشاطر المرشح المحتمل لرئاسة جمهورية مصر العربية أول ما شطح نطح زي مابيقول المثل الشعبي! فيه إيه ياهندزة؟ مش بالراحة علينا شوية ولا انت جاي مستعجل؟ إنت بتقول انك جاي تطبق الشريعة الإسلامية ودا في حد ذاته مش وحش لكن ما قلتلناش أولاً انت جاي منين وحتطبقها علي مين؟! لدرجة إن واحد صاحبي فقري قال لي: دا لازم حيطبقها ويحطها في جيبه زي المنديل.. ياباشمهندز أولاً كفارة بمناسبة الافراج عنك وثانياً مبروك عليك رد الاعتبار وعقبال الشعب المصري من ساسه لراسه ودا حيحصل قريب باذن الله بعد الموجة الثانية من ثورة 25 يناير المجيدة قول ان شا الله إنما عبارة انك جاي تطبق الشريعة الاسلامية دي جت واسعة منك حبتين لأنك أولاً صدقت ان الطبخة اللي انتو عاملينها مع العسكر حتتاكل وتنهضم ودا نوع من الهطل السياسي ياهندزة ماكانش يصح تقع فيه، وهي برضه الشريعة الاسلامية قالت لك «اخطف واجري» ثم تعالي هنا إنت ليه بتتكلم وكأنك قائد الثورة اللي لولاها كان زمانك لسه في الزنزانة وأوعي تقول لي انك ما عندكش فكرة عن تواطؤ الجماعة مع العسكر ضد الثوار وأوعي تقوللي انك ما تعرفش عدد الثوار الموجودين الآن في سجون العسكر وأوعي تقوللي انك ما تعرفش إن المجلس الأعلي للقوات المسلحة هو من صناعة سوزان ثابت وجمال مبارك وأخيرا اللي اسمه اللص الفاسد حسني السيد إبراهيم مبارك المخلوع من علي عرش مصر كما يخلع الفلاح المصري البلغة من رجليه المقشفة يا هندزة. ثم أنت جاي باصم بالعشرة لليهود والأمريكان انك موافق علي كامب ديفيد وملتزم بيها ولا أنا مش واخد بالي؟ تصدق وتؤمن بالله يا هندزة أنا كنت راسم لك في دماغي صورة غير كده خالص أي نعم هي مش صورة عنتر بن شداد ولا أدهم لكن علي الأقل صورة بني آدم بيحترم آدميته وأفكاره لكن مع الأسف لقيت منتهي أملك وطموحك انك تقعد جنب مصطفي بكري تحت قيادة سعد الكتاتني طب بذمة النبي مش كده أنا انصدمت فيك؟ ليه كده ياهندزة؟ وبعدين دنا أعرف أنك معاك فلوس كتير قوي.. عايز إيه تاني؟ ما تهمد شوية ياهندزة وبلاش الشوشرة اللي انتو عاملينها دي خلينا نعرف نشوف البلد رايحة فيه وجاية منين وحسبنا الله ونعم الوكيل في كل من مد ايده علي قوت الغلابة ويبقي ينزل له بالسم الهاري اللي يفرتك مصارين أمه ويصبح فرجة للي يسوي واللي مايسواش واخص بالذكر الحرامي مقطوع اليد اللي اسمه حسني السيد إبراهيم اللي شاله الزمن وحطه علي عرش مصر الذي تجري من تحته الأنهار وادي آخرة حكم العسكر ستين سنة بالتمام والكمال وعلي شرط كلهم هزايم ونكسات وحتي النصر الوحيد اللي دفعنا فيه دم الشهيد الغالي سنة 1977 راح السادات باعه في سوق النخاسة للصهاينة والأمريكان اللي هما حسب معلوماتي أعداء الاسلام ياهندزة ولسه تاني جاي تقول لنا الشريعة الاسلامية! طب استني لحد ما العبارة تقدم شوية وقال علي رأي المثل «قال له يابا شرفني قال له يا ابني لما يموت اللي يعرفني» وصدقني يا حاج خيرت احنا بقت روحنا في مناخيرنا والشعب المصري خلاص فاق من النومة الأزلية ولا عادش لا حيخاف ولا حيضحك عليه اللهم بلغت اللهم فاشهد والسلام علي من اتبع الهدي و»باي بقي».