نشر المطرب محمود العسيلي، صورة تجمعه بوالده، عبر حسابة الرسمي على موقع تبادل الصور الشهير "إنستجرام"، وعلق عليها قائلًا: "كنّا لسه قاعدين في حتة أول إمبارح واشتغلت الأغاني الفرنساوي اللي انت بتحبها وحسينا إن حضرتك جاي بتمسي علينا وساعتها افتكرت مين اللي علمني كل دا، مين اللي علمني إزاي أسافر وانبسط وأبسط اللي حوليا وإزاي أتفسح وآكل في الأماكن الحلوة". وأضاف: "مين اللي علمني أسمع مزيكا وإزاي أذوق كل مزيكا واستمتع باختلافها، مين اللي علمني أقدر الطبيعة الحلوة اللي ربنا خلقها وأبص على الجبال والأنهار والبحر والغروب والشروق، دول صورتين من آخر أعياد ميلاد ليك وحضرتك معانا ودا أول عيد ميلاد نحتفل بيك وانت مش معانا بس أكيد في مكان أحلى بكتير يا رب تبقى مبسوط في مكانك". وختم العسيلي حديثه قائلًا: "كل سنة وأنت طيب يا أبويا يا ضهري وسندي وربنا يقدرني أحافظ على سيرتك الحلوة دايما، الله يرحمك ويغفرلك ويسكنك فسيح جناته بشفاعة رسوله الكريم وأهل بيته اللهم آمين".