الواد حسين عبدالغني «مع حفظ الألقاب» طالع في برنامج آخر النهار في قناة النهار وجايب شوية عيال من ثانوي وعامل عليهم ألفا، وبيدردش معاهم في الثورة والوطن! أنا بقيت طاير في السما فوق الجرح والحزن والهم تقبل ياسبحان الله.. أنا أصلي شفت حسين عبدالغني وهو لسه قدهم تفتكروا شفته فين؟ أكيد حتقول لي في مظاهرة ولا اعتصام طلابي ولا في حفل تخرج ولا في ندوة ثقافية ح أقول لك لأ أنا ياسيدي شفته في ليمان «أبو زعبل» والعياذ بالله وما كانش لوحده دا كان معاه عيلين تانيين واد فيهم حماد والثاني اسمه صفوت ماهم دول اللي كتبت فيهم: صباح الخير علي الورد اللي فتح في جناين مصر صباح العندليب يشدي بألحان السبوع يامصر صباح الداية واللفة ورش الملح في الزفة صباح يطلع بأعلامنا من القلعة لباب النصر *** العيال دول فيهم بنوتة اسمها «ريم الصاوي» ايه ياخويا العقل والرزانة دي كلها وجايباهم منين؟ هي شكل الوردة البلدي اللي لسه بتفتح في وش الشمس وأول ما تقرب منها يغرقك عبيرها الساحر النفاذ والله وحبلتي وولدتى يامصر يا محروسة انتي ايه؟ ما تعبتيش م الحمل والولادة! تقوم ترد عليك بكل عين قوية: ماهم الكلاب مابيتعبوش من نهش لحم ولادي الطيبين آه.. أتاري البت ايزيس بنتي كانت امبارح في الأون تي في بتبتسم بخبث وهي بتقول في برنامجها الممتع الجميل «بلدنا بالمصري» رجعوا التلامذة.. والبت ايزيس بنتي دي هي ريم ماجد ايقونة قناة الأون تي في ونرجع بقي للورد اللي فتح في جناين مصر اسم النبي حارسهم عمالين يزرعوا زي الصبار ويفرشوا زي ورد النيل ويا ويلك ياظلام ليلك ياللي تحاول تحبط أو تسرق ثورتهم ثورة 25 يناير المجيدة والحقيقة إن اللي كشف لي العيال دول كان الدعوة للعصيان المدني ودور الطلبة في موضوع الجامعة الأمريكية والجامعة الألمانية والمدارس الثانوية علي امتداد مصر المحروسة طالبين من المجلس الأعلي للقوات المسلحة انه يرحل ويسلم السلطة للمدنيين وكده حلو قوي وكفاية تلاكيك وتماحيك لأن قطر الثورة اتحرك من محطة القيام واللي حيقف في طريقه حيدهسه مع الأخذ في الاعتبار ان دم الشهداء من أول مينا دانيال لغاية أنس محيي الدين مش حيضيع هدر وعلي قد ما الفلاح المصري حمول وصبور علي قد ما يبقي رهيب إذا نفذ الصبر والعياذ بالله وأحب أقول لسيادتك ان الثورة المصرية لسه مابدأتش ولما تبدأ حتسوي الهوايل واللي مش مصدق يولع بجاز وحنروح بعيد ليه.. امبارح بس كان كل صحابي بيقولولي: بقي مراهن علي العيال أم بنطلونات ساقطة؟ أقول لهم: هما دول ولما حصل واتحقق حلمي بثورة 25 يناير المجيدة قالولي: بس مين حيسيبهم؟ قلت لهم: اللي يقدر عليهم يحوشهم. وتصور بعض السمك الميت من رؤوس ولصوص نظام اللص الفاسد حسني مبارك ان ضرب الثورة ممكن وكان رد الثوار كعادتهم تقديم المزيد من الشهداء الأبرار اللي هما رصيد في بنك الثورة ورصيد سوف يدفع كاملا غير منقوص وعلي رأي الفن ان الشعبي الخالد شكوكو «الأيام بينما»
