لايجب أن تمر " مجزرة التحرير " مرور الكرام ولايجب أن نتصالح مع الجانى حتى ينال عقابه الذى يستحقه , ولا يجب أن نكتفى بعبارات الأسف التى أطلقها المشير طنطاوى فى بيانه الى الأمة واعتذارة عن وقوع ضحايا فى عمر الزهور واجهوا رصاص الأمن وخرطوشه وقنابله السامة بصدور عارية , مثلما اعتذر مبارك من قبله عن أسفه لوقوع ضحايا فى ثورة 25 يناير . من حق الشعب المصرى الذى انتفض لكرامته أن يعرف الحقيقة كاملة وما هى حكاية الطرف الثالث الذى يتحدث عنه الجميع فى الميدان والذى قلب الدنيا رأسا على عقب فى التحرير ويشعل نار الفتنة كلما هدأت من خلال خرطوش طائر أو طوبة أو زجاجة مولوتوف تحرق الجميع . لا أنكر أن ميدان التحرير مليان شباب زى الورد جاءوا للرد على تجاوزات الشرطة ضد الشعب ولكننى ايضا لا انكر ان هناك ناسا فى التحرير أشكالها غريبة مش ممكن يكونوا من الثوار لأنهم جاءوا الى التحرير يحملون كافة أنواع الأسلحة ومالهمش هدف واحد غير إن البلد دى تولع . الأخبار المتواردة من الميدان تقول: ان هناك ناسا دفعوا فلوس لبعض البلطجية علشان يولعوا الدنيا قبل الانتخابات لأنهم بصراحة كده مش عاوزين انتخابات طالما هما مش فيها وبالبلدى كده يافيها ياخفيها كما يقول المثل المصرى وطبعا طالما هما مش فيها يبقى تخفى مصر واللى فيها ؟ الغريب ان كل الناس مقتنعة ان فيه ناس بتدفع فلوس علشان تولع البلد والمجلس العسكرى عارف كده والشرطة عارفة كده والأغرب ان ماحدش عارف أو عاوز يعمل حاجة تكشف لنا مين هما الناس دى لانه من غير المعقول انهم كائنات فضائية تغزو مصر وتغزو ميدان التحرير . صديقى قال لى: إنه سمع واحد بلطجى واقف فى موقف المظلات بعبود بيحاول يجند الناس الغلابة للنزول الى شارع محمد محمود مقابل ألف جنيه , تصور تنزل شارع محمد محمود قدام وزارة الداخلية وتاخد الف جنيه , ولنا ان نتخيل كام واحد فى مصر ماشافش الالف جنيه دى قبل كدا ونفسه فى خمسه جنيه ومن الطبيعى ان يسيل لعابه على الفلوس ويعمل اى حاجة بدون مايفكر الكلام دا حصل فى موقف عبود طيب شوفو مصر فيها كام موقف وفيها كام بلطجى وفيها كام واحد معاه فلوس ومش عاوز الانتخابات تتم وفيها كام واحد مش لاقى جنيه مش الف . نفسى المجلس العسكرى يشكل لجنة تحل لنا لغز الطرف الثالث واعتقد أنها مش صعبة اوى اننا نعرف الحقيقة ومصر مليانة ناس بتفهم وتعرف تفكر والتحرير مليان ناس كتير قوى بتعرف تفكر مش كلهم بلطجية ..
