وقع الفنان الكوميدي محمد سعد في سقطة أخرى بسبب برنامجه "وش السعد"، فبعد أن أثار الغضب بحلقته الأولى مع الفنانة اللبنانية هيفاء وهبي، عاد مرة أخرى ليثير غضب الفنان الشاب هادي خفاجي. وأكد "هادي" عبر حسابه الشخصي على موقع التواصل الاجتماعي "فيس بوك" أن "سعد" تجاهله، وقام بالاستعانة بفنان آخر خلال آخر حلقات برنامجه. وقال "قررت أنا هادي خفاجة اعتزال التمثيل نهائيا في مصر، وده بسبب الموقف اللي أنا هاحكيه، موقف في قمة قلة الذوق اللي في الدنيا". وتابع "جاتلي مكالمة الساعة 12 بليل إن محمد سعد عايزني في تصوير في حلقة من برنامج (وش السعد) اللي هي كانت اليوم، وأنه عايز يقعد معايا، طبعا لبست وروحتله الساعة 1 بليل كان موجود الكاست كله ونجوم الحلقة أيتن عامر ومنة عرفة، وعملنا بروفة واتفقت مع مدير الإنتاج والملابس وكل حاجة وأستاذ سامح عبدالعزيز المخرج قعدت معاه واتكلمنا عن الشخصية". وأضاف: "اتفقنا أن التصوير بعدها بيوم خلصت كانت الساعة 4 الفجر، روحت البيت نمت وصحيت، استعديت نفسيا أن رايح التصوير وحفظت السيناريو، وكان الميعاد الساعة 5 المغرب". واستطرد قائلاً "بعدها لقيت اتصال وأنا في الطريق الساعة 4 العصر من واحد من مساعدين الإخراج بيقولي أستاذ هادى إحنا أجلنا الاسكتش بتاع حلقة حضرتك وهنكلمك نقولك أمتى التصوير إن شاء الله". وقال "بفتح MBC مصر، لقيت الإسكتش بتاعي أتصور بممثل تاني! طب ليه اللف والدوران؟.. الحمد لله تاريخي مش هيقف على حلقة، بس موضوع تقدير، أنا حبيت أحكي لأني وسط حاجات كتير حصلتلي مكنتش مستحمل حركه زي دي، وبكرة بإذن الله هاكون في نقابة المهن التمثيلية وهسلم أستاذ أشرف زكي عضوية النقابة، لأنها متلزمنيش في شيء دلوقتي، بس بجد كفاية تدمير في المواهب وإحباط في الناس لأن الوسط بجد أصبح عصابات تتحكم فيه". وأنهى تدوينته قائلاً: "إن شاء الله هكمل مستقبلي الفني في دولة تانية بتقدر الإنسانية قبل المواهب والمجالات وده قرار نهائي بجد بيني وبين نفسي مش هرجع فيه".