دستور دفع ثمنًا له خيرة أبناء مصرنا الحبيبة من أرواح طاهرة ودماء ذكية.. دستور بذل فيه مجموعة منتخبة من مجلسي شعب وشورى منتخبان من أكثر من 30 مليون مصري. دستور استمر العمل به ستة أشهر كاملة بعدة لجان متخصصة ولجان استماع جابت محافظات مصر وخارج مصر للتتعرف على متطلبات الشعب المصري بمختلف أطيافه الاجتماعية والفكرية والثقافية والجغرافية. دستور صاغه قامات مصرية سياسية وقانونية ودستورية ومهنية وأدبية ودينية ليخرج معبرًا عن معظم وغالبية أطياف نسيج الشعب المصري.. دستور تابعه العالم خلال جلسات متنوعة مطولة تجعله أفضل وثيقة دستورية ممكنة قد تكون بها بعض السلبيات، ولكنها لا تؤثر أبدًا أو تمنع أنه أفضل دستور في العالم كما قال د. زغلول النجار، وإلا ما تم طباعة نسخ مزيفة لتضليل الشعب عن حقيقة الدستور وبدليل أنه لم يقدم أي من رافضيه بدائل أفضل منه. يعني ده أول دستور مصري يكفل بدل بطالة (ضمان اجتماعى)، يعنى أيه يعنى ست البيت اللى قاعده بتربي العيال والعاطل اللى مش لاقى شغل ليه مبلغ معين من الدولة يوصلهم أول كل شهر. يعني الدولة تكفل الخدمات كخدمة التأمين الاجتماعي، فلكل مواطن حق في ضمان اجتماعي لو مش قادر على إعالة نفسه أو أسرته أو في حالات العجز عن العمل أو البطالة أو الشيخوخة ويضمن لهم حياة كريمة.. يعني مفيش حاجة اسمها معاش إعانة "شحاتة" يعني بتاع 70و100و 150 و 200 جنيه ده لا هيبقى زيه زي الحد الأدنى للأجور والمرتبات وهو حاليًا 750 جنيه وفي اتجاه لزيادته كمان. يعني الدولة تكفل خدمة الرعاية الصحية لكل مواطن سواء موظف أو طالب أو عامل مؤمن عليه أو حتى غير مؤمن عليه، كل مواطن مصري الدولة عليها توفير الرعاية الصحية ليه، حتى أمريكا مفيهاش الكلام ده اللي يدفع يتعالج واللي مبيدفعش يتعالج على حسابه هو حر. ده غير خدمات وحقوق وحريات وزيادة إنتاج واقتصاد وتنظيم عمل ودور المؤسسات وصلاحيات الرئيس اللي قلت كتير جدًا وبقى ممكن نحاسبه أو نقيله كمان، ورئيس الوزراء اللي بقه مهم جدًا والشورى اللي بقى ليها دور مهم والشعب وتوسيع اختصاصاته الرقابية، أما بقى الأهم لكل مواطن وسبب الفساد اللي فات هي المحليات، وتتدرج اختصاصاتها خلال 10 سنوات حتى يكون المجلس المحلي المنتخب من الشعب بديل عنها، وبيراقب ويحاسب المحافظ ورؤساء المدن وبيتابع الميزانية الخاصة بكل محافظة ويقر مشروعاتها، يعني قضاء كامل على الفساد بكل صوره، ومننساش دور الجيش الوطني في حماية الدولة وأمنها خارجيًا وداخليًا ومتابعته. طيب ليه الهجمة اللي على الدستور من الإعلام الفاسد والفلول وغيرهم، لأن الدستور ده هيحرم بعض الفلول الفاسدين من لجنة السياسات ورؤساء الأمانات بالمحافظات وأعضاء مجلسي الشعب والشورى المزورين الماضيين مش هيقدروا يشاركوا في الحياة السياسية لمدة 10سنين، بس كده لا.. وكمان المستشارين والقضاة اتمنع يمارسوا أي عمل يتربحوا منه أو يستغلوا نفوذهم أو يستغلهم النظام في تفصيل قوانين وأحكام لحمايته، وطظ في الشعب ومنعهم كمان إنهم يكونوا مستشارين بالأجر في أي وزارة أو مؤسسة بس كد لا والأهم ربط الحد الأقصى للأجور زعل ناس كتير كانت عايشة على دم الغلابة وعاوزة الفساد يفضل لأنهم كده مرتاحين وغيرهم مش لاقي. من الآخر ده دستور لكل مصري موظف وعامل حر وفلاح وعاطل ورجل وامرأة وطفل ومسلم ومسيحي وقادر وغير قادر وسياسي وغير سياسي.. دستور راعى الحريات والأجر والعمل والصحة والسكن.. وحمى الأرض والجيش والشرطة والزراعة والتعليم والاقتصاد والتجارة والملاحة والسياحة ونظم العمل لدولة.. فعلاً مؤسسية وكل ده هيتنظم بقوانين في مجلسي الشورى.. والشعب اللي برضه هو اللي هيختارهم بإرادته. متخليش حد يضحك عليك ويقدم لك أكاذيب لمصالح خاصة.. إقرأ بنفسك الدستور الصح الموقع من المستشار حسام الغرياني.. وقرر بنفسك وشارك في حماية ثورتك وبناء بلدك ومستقبلك ومستقبل أولادك.. لازم تشارك متسبش حقك اللي ضاع سنين.