رصد مواطنون نموذجا صارخا للإهمال الذي يضرب أرجاء مستشفي كفر الزيات العام بالغربية ، فلم يقتصر الوضع علي الإهمال الطبي والفوضي ولكنه تضمن الإهمال العام في نظافة المستشفي من الحشرات والمخلفات الطبية حيث انتشرت القطط لتصل إلي داخل العناية المركزة. وعلق طبيب حديث التخرج يعمل بمستشفي كفرالزيات العام في رسالة للحكومة علي الإهمال الذي يضرب المستشفى - رافضا ذكر اسمه - قائلا: "فيه مستشفي حكومي في مصر عدلة اصلا ؟ المستشفي العام زيها زي الجامعة زيها زي غيرها من المستشفيات الحكومية ومفيش دكاترة بتشتغل بضمير ولو فيه فالامكانيات مش مساعداهم أصلا ولا أجهزة ولا مستلزمات طبية ولا حتي أدوية ولا حتي اقل حاجة يبقي فيه نضافة في المستشفي ، احنا في مستشفي كفر الزيات العام عندنا جهاز بايظ بقاله اكتر من شهر بنبعت للوزارة والمديرية ولا حياة لمن تنادي. وأضاف الطبيب: "غير كدة الدكاترة إلي مبتجيش ومش عايزة تشتغل إلي بيحصل من مدير المستشفى انه بيفضل يدي في جزاءات وفاكر انه كدة بيصلح فيهم وهيتعلموا ويلتزموا إنما مفيش فايدة العيب في النفوس نفسها". وأضاف: "ادارة المستشفى سياستها غلط وفاكرة انها كدة بتعمل الصح ، ومعلش مش هتبقي المشكلة في المستشفى والمعدات ونفوس الدكاترة كلهم ونسيبها ونقعد تقول المدير السبب ، هو مش هيروح علي ضمير كل واحد ويصحيه وأي مشكلة بتحصل بيبقي سببها المسئول عن الحالة ، وهو حاول كذا مرة يسيبها وكيل الوزارة موافقش لان مش لاقيين غيره يمسكها اصلا". وأوضح الطبيب: "لو الحكومة مش هتعرف تصلح المستشفى وتخليها مصدر للعلاج تتقفل أحسن بدل ما تبقى مجزرة للموت بالشكل ده ، إحنا نفسنا الدكاترة لو سألتنا انتو عايزين تشيلو المدير ليه ؟ هيقولك عشان بيدينا جزاءات كتير ومش مرتاحين ، كدة يعني لا همنا مستشفي تتصلح ولا غيره". أضاف الطبيب معلقا على الصور المتداولة: وبالنسبة لموضوع ان المدير بيسيب المستشفي عشان شغله الخاص فحضرتك ياريت تروح تشوف عيادته بقت بتشتغل فترة واحدة بسبب انه فترة الصبح شغله بيبقى في المستشفى بس ولو المشكلة الشغل الخاص كان غيره اللي كان متفرغ وبيبات ف المستشفي عرف يعمل حاجة". واختتم الطبيب رسالته: الموضوع موضوع فساد كامل ومش هيتصلح بفرد واحد ولا اتنين منظومة كاملة بايظة وهي منظومة الصحة في مصر من نفوس وإدارة ومعدات طبية. وأكد علي الشرقاوي مواطن من أبناء مدينة كفرالزيات أن مباني مستشفي كفرالزيات العام أصبحت نموذج صارخ للإهمال في جميع المجالات وأصبحت المستشفي ترفع شعار " الداخل مفقود والخارج مولود" لافتا أن الإهمال الذي تفشي بالمستشفي كالصاروخ تسبب في وفاة ربة منزل أثناء إجراء عملية ولادة منذ عدة أيام ناهيك عن انتشار القطط التي وصلت إلي العناية المركزة بالمستشفى.
