قامت مبادرة "خريطة التحرش الجنسي"، اليوم الإثنين، بنشر شهادة لإحدى الفتيات تعرضت للتحرش من قبل مجموعة من الشباب أثناء ركوبها التاكسي. نص الشهادة: النهارده وأنا طالعة من الجامعة ركبت تاكسي وأول ما ركبت لقيت 2 بموتوسيكل في سن 30 أو 35 سنة، أعدوا يقولوا للتاكسي الله يسهل لك ويا بختك يا عم وكلام قليل الأدب، راح بتاع التاكسي كسر عليهم وخلاهم يقفوا.. نزلوا يتخانقوا مع بتاع التاكسي، راح بتاع التاكسي قال لهم أنتوا مش صغيرين عشان تعملوا كده عيب، راحوا قعدوا يشتموه ويقولوا إحنا ممكن نكسر لك العربية ونعمل ونعمل وشتايم، وواحد منهم دخل أيده من الإزاز مكان ما أنا كنت قاعدة وعمال يشوح بأيده، أنا كنت عايزة أخد موقف وأشتم وأبهدلهم بس خوفت من رد فعل أيده اللي في وشي دي، رحت قلت لبتاع التاكسي خلاص امشي علشان دول مش هيبطلوا زعيق وشتيمة، دا غير أننا كنا على طريق مافيهوش حد، روحت شغلي وأنا مخنوقة جدا لأني ماعرفتش أخد حقي. دي أول مرة أحس أني ماكنتش عارفة أخد حقي، بس كنت مبسوطة جدا من رد فعل بتاع التاكسي جدا، وشكرته وأنا نازلة على موقفه.