علّق الإعلامي تامر أمين، على واقعة المشادة التي وقعت بين الإعلامي باسم يوسف والإعلامي خالد أبو بكر في نيويورك، قائلًا: «أنا عندي عتاب وإدانة، العتاب لخالد أبو بكر إن أنا في رأيي إنه مكنش يكتب على تويتر كده لأن هو ده اللي عايزه باسم يوسف، باسم كان بيتحرش بالمجموعة الإعلامية عشان يعمل كده». واستكمل أمين في برنامجه «من الآخر» على قناة «روتانا مصرية»، مساء الاثنين: «خالد أبو بكر قال إن هو عمل اللي طلبه باسم، لأنه طلب إن الرسالة توصل للإعلاميين وأنا وصلتها على تويتر»، وأضاف أمين: «لكن الإدانة الكاملة لباسم يوسف، أنا مش عارف ليه باسم بيعمل كده، ده كان إعلامي مصري وكان ليه أشهر برنامج ساخر في مصر».
ووجه أمين حديثه لباسم يوسف قائلًا: «الاختلاف في وجهات النظر ميدفعناش إننا نفتعل مشاكل ونلجأ للسب والقذف والتخوين، أنت متضايق إن السيسي رئيس جمهورية إنت حُر اعرض رأيك وهما يردوا عليك ويبقى الحوار محترم بين إعلاميين محترمين، أنت كان عندك رصيد كبير عند المشاهدين خصوصًا وقت حكم محمد مرسي وجماعة الإخوان ليه أنت متعمد إنك تفقد هذا الرصيد كله، الإعلامي اللي زيينا ميملكش غير رصيد المصداقية والحب».