* أحلي الكلام.. بسم الله الرحمن الرحيم "إنا أنزلناه في ليلة القدر وما أدراك ما ليلة القدر ليلة القدر خير من ألف شهر تنزل الملائكة والروح فيها بإذن ربهم من كل أمر سلام هي حتي مطلع الفجر" صدق الله العظيم ما أروع واجمل كلمات الله وما احلي ان تعيش علي أمل ان يرزقك الله بليلة القدر فترفع الأكف عاليا تطلب من الله الصفح والغفران والستر والرضا والحب.. حب الإنسان لاخيه الإنسان حب الخير لاخيك كما تحب لنفسك.. وان يحرس مصر من الأعداء.. آمين. * الأهلي عليه 90 دقيقة اشغال شاقة كروية أمام فريق المولودية.. إياكم ان تفرطوا في نقطة.. وبعدين الأهلي حيدافع ليه.. حاجة غريبة. * قبل بداية الموسم.. بدأت الاصابات وبدأ الطرد.. وبدأت المشاكل.. حد يقولي جونيور البرازيلي حيبعد شهر ليه.. هو لسه بدأ.. ودومينيك طرده ليه عم جوزيه.. وايه حكاية الخروج عن النص.. هو انت لحقت ياراجل وكل سنة وأنتم طيبين. * استقالة اشرف صبحي.. تفتح الباب امام عودة خالد رفعت.. والمجلس بيقول للمعلم علي طريقة حادي بادي.. أما حسني عبدربه أو ماني.. بالذمة في حد يقول كده.. مصلحة الفريق ممكن الاتنين.. ولو مش قادرين.. فضوها سيره.. بلا وجع قلب. * ياسلام.. الأزمة المالية لماذا لم تمتد لبعثة الفريق بغينيا.. قصدي ليه عضوين مجلس إدارة.. ما كفاية المهندس طارق غنيم.. ياتري الدكتور اسامة مسافر ليه.. استجمام.. ولا فسحة.. ولا مافيش أزمة مالية.. افيدونا.. افادكم الله. * جائزة البي بي سي ليست وساماً علي صدر حسن شحاتة فقط وإنما علي صدر الكرة المصرية بأسرها.. لأنها جاءت لفوز مصر بكأس افريقيا ثلاث مرات متتالية اعوام 2006 و2008 و2010 فعلا شكرآً للمعلم.. وشكراً لكل النجوم الذين ضمتهم لوحة الشرف.. وشكرا لسفارة تونس بالقاهرة لتكريم المعلم. * ياتري حنقف نتفرج علي دراويش الاسماعيلي وهم يعيشون حالة من عدم الاستقرار.. الاسماعيلي يضيع.. وينهار.. انقذوا برازيل الكرة المصرية قبل فوات الأوان.. فإذا كان الأهلي والزمالك هما الكرة المصرية فالاسماعيلي فاكهتها وحلاوتها.. مش كده ولا ايه.. الحقووووه. * منتخب الاسكواش.. بصراحة حاجة تفرح.. انتصارات وبطولات حقيقية عالمية مش محلية.. تسلمي يانور.. تسلموا ياولاد ربنا يحميكوا.. علي فكرة هي واليد يستحقوا التكريم. * مبروك للمصري شركته المساهمة.. المهم أنها تكون مساهمة لرفع النادي.. ومساهمة في ارتفاع الدوري.. ومساهمة في منافسته علي أول لقب في تاريخه.. مش كده ولا ايه.. برافو كامل أبوعلي.. هكذا من يحب بصدق. * د.عفت السادات.. بصراحة بيعمل مجهود خارق في اعادة.. واستعادة امجاد الاتحاد السكندري سيد البلد.. ربنا معاكم.. نحن في الانتظار. * ياتري المنصورة والترسانة وأسوان.. عندهم حق.. ام لا.. بصراحة كان لازم يلعبوا دورة تانية.. التمسوا ذلك من زاهر والعبوا.. خسارة.