سألت صديقي.. تخيل يا صديقي الحياة بدون ستات.. تفتكر ممكن يبقي شكلها إيه؟! رد صديقي: حتلاقي الشوارع فاضية والأسواق آخر هدوء وشركات الاتصال تعلن إفلاسها وأدوية السكر والضغط لن يبقي لها أي لزوم.. وحياتك ياعم حيبقي لها طعم تاني خالص.. بمبي.. بمبي.. بمبي!! قلت: مش كدا وبس يا عزيزي.. دا المواصلات كمان حتبقي آخر "ألاجه". تركب براحتك وتقعد براحتك. دون أن تنظر لك إحداهن ولسان حالها يقول: "أما راجل عديم الإحساس بصحيح".. حتلاقي الرجالة "آخر انشكاح" والقرش بيجري في إيديهم وممكن ينزلوا القهوة كل يوم ويتفرجوا براحتهم علي ماتشات الكورة كلها ولتذهب برامج الطبخ والسمنة والمسلسلات التركية والواد "مهند" الغلس إلي الجحيم.. مش بس كدا دا ممكن الواحد من دول يزور أهله ويسلم علي أمه في أي وقت دون تنغيص ونكد وعكننة والواحد يقدر يا أخي أخيراً ياكل اللي في نفسه دون قيود. يأكل كل اللي كان محروم منه خاصة "الكرنب" مثلاً.. وينام براحته من غير شخير ولا "رفس" علي الأقل يرتاح من حكاية الضرب علي "قفاه" كل يوم وهو نايم بحجة أن المدام نايمة ومش قاصدة. قال: والأهم من كل دا يا صديقي أن الشيطان سيصبح "عاطل" ومعندوش شغل. عارف معني كدا إيه.. معناه إن أنا وأنت وكل الرجالة يا جميل رايحين علي الجنة!! افتكاسات * أكدت مصادر علمية مؤخراً أنك سيدتي الجميلة إذا أضفتي 4 ملاعق من "البن" مع عسل النحل وقليل من "الماء" يصنع لكي "ماسك" للشعر يضفي عليه بريقاً وحيوية. "يا سلام بقه لو كان البن محوج" والماء "علي الريحة" تبقي العملية "مظبوطة" ميه في الميه!!