وجّه المستشار وليد شرابي المتحدث الرسمي باسم قضاة من أجل مصر وعضو جبهة الضمير رسالة لمحمد سلطان الذي تنازل مؤخرا عن جنسيته المصرية مقابل حريته وسفره الى امريكا. وقال شرابي عبر صفحته الشخصية على موقع التواصل الإجتماعي "الفيس بوك":" عزيزي محمد سلطان ماتزعلش عارف ليه مش عايزك تزعل ؟ .. لأني سمعت ناس فرحانة وشمتانة وبيقولوا عليك انك اتنازلت عن جنسيتك المصرية". وتابع قائلا:" عارف يا محمد الناس اللي شمتانين دول اتنازلوا عن حاجات كتير قبل ما يشمتوا فيك .. ففي ناس مصريين اتنازلوا عن دينهم منهم علماء دين وصفوا السيسي ومحمد ابراهيم انهم انبياء ومرة اخرى وصفوا السيسي انه المسيح المخلص ،وافتوا بقتل الناس بغير حق ،وبرروا كل الجرائم". واضاف في رسالته لسلطان قائلا: " صحفيين وإعلاميين وكتاب خصصوا كل وقتهم وجهدهم لشتيمة السعودية وتركيا وقطر وحماس ووصموهم بالارهاب". واضاف:" وفي ناس غلابة لكن ماعندهمش مخ ومالهمش مصلحة في اي حاجة فرحانين بكل ده وشاركوهم في الذنوب مع ان الحياة طحناهم ومش لاقيين يربوا عيالهم وناس منهم بتاكل من الزبالة. .وفي ناس تانية مصريين ايضا اتنازلوا عن شرفهم ،وخلي اصحابك يحكولك عن مدرب الكاراتية بتاع المحلة وحكايته مع سيدات المجتمع واللي اجوازهم شافوا الفيديوهات ومطنشين كانهم ماشفوش حاجة ،وفي حاجات تانية كتير في موضوع الشرف ده لكن مش وقتها". واختتم شرابي رسالته لسلطان قائلا:" عارف يا محمد انت المفروض تحمد ربك لانك احسن من كل دول انت ماتنازلتش عن دينك ولا عن شرفك ولا عن أي حق من حقوقك. انا زرت أمريكا من فترة قريبة ولاقيت امريكان كتير بيحبوا مصر وكارهين اللي بيحصل فيها اكتر من مصريين كتير عندهم استعداد يبيعوا اي حاجة واحيانا بدون مقابل". واضاف:" انت ما اتنازلتش عن جنسيتك المصرية انت اصبحت رمز للكرامة والوطنية لكن اللي اتنازل عن جنسيته هو اللي قتل وسرق وهدم بيوت الناس وحبس الأبرياء واغتصب البنات في السجون وحكم على الناس بالاعدام ظلم ،والاجراء اللي انت عملته فرحت بيه اهلك ومنهم الوالد الكريم في محنته ،وأسعدت حبايبك ،وحافظت بيه على حقك في الحياة والحرية والكرامة".
