شوفتى نفسك ف المرايه وللا موش قادره تشوفى اللى فيكى من شظايا خوفت ف القلب خوفى واللى فيكى من خطايا ينكسف منها كسوفى واللى فيكى من بلايا فجرت فيكى ظروفى إنتى أم اللى بغباءهم كل ساعة بيحروقكى إنتى أم اللى بذكاءهم من جيوبنا بيسرقوكى إنتى أم البلطجية اللى بمطاويهم سيوفهم بعد ما قبضوا التمن قبل ما تمشى بنا أصروا يوقفوكى اللى ناويين يدبحوكى ارحمينا وافضحيهم واكشفى الغدر اللى فيهم واقلبى الدنيا عليهم اللى فاكرينك صبيه يلعبوا فيكى بمزاجهم يكشفوا عورة بناتك لاجل ما يغطوا اللى عابهم يسلبوا منك شبابك لاجل ما يداروا اللى صابهم البلاوى اللى إنتى بالطهر اللى فيكى درة الدنيا وتاجهم اللى فاكرين إن عرضك هوه ف الدنيا احتياجهم اللى عاوزينك يا طاهره تبقى ليهم وإنتى ليا يدبحوكى وإنتى فيه يخنوقكى بالكليكات الغبيه و للى حاولوا يكفروكى وإنتى قبل الكون ما يبقى كنتى ف كتاب اللى خالقنا نبيه جالها موسى وجالها عيسى وجالها إبراهيم ومنها كات له هاجر وأم زوجة خير خلق الله ماريه بصى تانى فى المرايه وإن تعبتى اكسريها واضحكيلها إن لقيتى وشى فيها شعر محمد إبراهيم أبو عصفور أرسل مقالك للنشر هنا وتجنب ما يجرح المشاعر والمقدسات والآداب العامة [email protected]