إوعى يا مصر تروحي إسكندرية أحسن تموتي تسكنى شقة صاحبها واللى بانيها حانوتي وإن قدرتى يا بهية تحت أنقاضها تفوتي ادفعى لهم ألف رشوة يشتروا بيها سكوتي إوعى يا مصر المباني يلعبوا حتى ف أساسك إوعى بالدبش الحجارة يلعبوا السيجا ف راسك إوعى وانتى بتستحمي يلمسوا حتى مداسك يشربوا دمك ف كاسك بالبشاعة والنجاسة والخطيئة البنكنوتي العمارة الكارثة وقعت لما بانى الملك خانك واللى فيها من ولادك اللى هانك واللى زانك واللى شارى فيها شقة بعد ما اتغرب عشانك واللى من خيبته أدانك واللى شدك من ودانك واللى كان نفسه ف أمانك واما جالك قطعه سيخ الحديد العنكبوتي كلهم ماتوا فى حضنك المقدس واللى كبر واللى كان بادى يصلي بس ما لحقشى يكبر واللى باستشهاده بكر واللى م الصدمة ماهوش قادر يفكر واللى م الكارثة ماهوش عارف يعبر واللى أنكر والمصيبة ف المقاول اللى صلبها وهنكر كلهم كان جاى يحذر م المقدر والمقدر بالمفاسد كان مجدر كان ف جدرانك مفجر والمفجر كان له تايمر واما حاولوا يحذروكي كنتى منصابة بزهايمر ماتوا واللى ما ماتشى بدعيله بقلبى وف قنوتي أرسل مقالك للنشر هنا وتجنب ما يجرح المشاعر والمقدسات والآداب العامة [email protected]