خلى دماغك كده ويايه.. مش هقول قالوا وقولنا.. هحكى وأقول على اللى جرالنا.. الغلا كوانى وبيلسعنى.. مرتبى كان بيدلعنى.. لا علاوة نافعة تداوينى.. ولا منحة حتى هتنفعنى.. حتى المواصلة اللى تودينى.. من قلة مابقتش ترجعنى.. لاعاد ورانا ولا قدمنا.. ربنا عالم بأحوالنا.. شغالين ليل ونهار.. مش لاحقين حتى فطار.. موظفين حالتهم جيم.. جيب مفهوش ولا مليم.. كل السوق مولع نار.. عيش ولحمة كمان وخضار.. معدش حد بيعزم حد.. حد السيف اللى جرحنا.. من أسعار بتدبحنا.. خفوا شوية يا تجارنا.. راعوا بس أحوالنا.. كلنا واحد فى مصيرنا.. بدون ما نغيب ضميرنا. أشرف أحمد صالح الطويل