مسحراتى مصر البهية اصحى وسبّح رب البَرية مشيت ارتل وانشد واجوّد وصوتى يجرى بين النواصى هنا بانقر.. هنا باعوّد هنا باحوّد عن المعاصى لو كنت بحرى لازم اقبّل وإن كنت قبلى.. لازم ابحّر ولحد آخر نفس ف صدرى هاشد قلبى وتر واسحّر يا مصر قومى وشوفى نيلك يامصر قومى وضمى سينا نهر المحبة بينتمى لك يا مصر شوفى احنا فين رسينا مصر البهية.. بالعقل هية ف الذكر آية.. ف العشق غية اصحى وسبّح رب البَرية.. ■ ■ ■ مسحراتى حاسس بالعزة والسرور من أكرم الشهور وقف التاريخ يشاهد نصر الشعب الجسور العالم والمجاهد ف أول العبور كان جيش أحمس هناك وجيوش المسلمين مار جرجس كان معاك بيحرر طور سنين طيرانى.. مدرعاتى وعلومى.. وحساباتى قرآن فجرى وصلاتى دعواتى للسماء أجمل أيام شبابى وجنود من جيش عرابى ع الساتر الترابى بيرفعوا اللواء ■ ■ ■ مدد يا عيون بلادى يا أحمد يا إسماعيل من يومك للسنة دى سيرتك فجر ودليل مدد يا جمسى.. نورك بدد ليلنا الطويل كان العبور.. عبورك على جسر المستحيل مدد يا فريق يا فوزى يا صبرنا الجميل مدد يا فريق يا شاذلى يا حلمنا النبيل مدد يا دفاع يا جوي دمر غرور عدوى مدد.. مدد يا مصرى يا مسلسل الوحوش مدد يا أحمد يا بدوى ويا قادة الجيوش عبدالعاطى يا عاطى القوة والثبات للآر. بى. جيه.. ف إيدك يصطاد الدبابات مدد يا أهل سينا يا سويس يا بورسعيد مصر اللى عايشة فينا من بحرى للصعيد حلفت بالله.. وبينا بالعاشق والشهيد تمحى الدمعة الحزينة بإيدين.. عبور جديد ■ ■ ■ مسحراتى ف الذكر هايم والنسمة حلوة ولا حد نايم والكل صابح معانا صايم ف الفجر يدعى ويقول يارب ■ ■ ■ رمضان يا أكرم م الشمس ذاتها أرواحنا عندك تبدأ حياتها والنفس راضية تلحق ما فاتها تطلب هداية وتقول يارب ■ ■ ■ المصرى بَنّا وفلاح وجندى وعندى جامع.. وكنيسة عندى الرحمة من دا.. والحب من دى ومن قلوبنا بنقول يارب