نفى رجل الأعمال أحمد الباز، صاحب محال قصر الكبابجي، وجود أي صلة بينه وبين شراء محلات صبحي كابر، قائلا: «ليس لنا علاقة بمحلات صبحي كابر». وأشار الباز، خلال اتصال هاتفي ببرنامج «حضرة المواطن» المذاع عبر فضائية «الحدث اليوم»، مساء الأحد، صبحي كابر أخ وأكلت عيش وملح في بيته، ومفيش لينا أي علاقة ببيع المحل.. هو أخ كبير لنا ونحترمه ونحترم كل المنافسين، لافتا إلى أنه «عندما دخل مجال السيارات كان كشريك وليس له علاقة بالإدارة». وكتبت الصفحة الرسمية لمطعم قصر الكبابجي، توضيحا لما تم تداوله خلال الساعات الماضية عن بيع مطعم صبحي كابر. وقالت في منشورها: «مساء الخير طبعا كلنا مصدومين للي حصل لعلم كبير جدا من أعلام الشغلانة، ويمكن واحد من أهم رواد المطبخ المصري حديثا وهوالغني عن التعريف المعلم صبحي كابر». وأضاف المنشور: «بدون الدخول في تفاصيل كتير لأن المعلم صبحي طلع، وقال كل حاجة بنفسه ولكن البعض يريد بشكل أو بآخر يحط اسم قصر الكبابجي في جملة مفيدة لأغراض لا يعلمها إلا الله عشان نكون سبب ضرر أو أذى لأي شخص كان، ويشهد الله أننا عمرنا ما عملنا ولا هنعمل ده.. لا يا جماعة، مش احنا المطعم الشهير اللي يقصده المعلم صبحي، بكل صراحة ووضوح وبدون تحوير، لا مش احنا، احنا بعيد جدا عن الموضوع ده ويمكن إحنا المكان الوحيد اللي دعمنا منافسينا مرة واتنين وتلاتة هنا على الصفحة، واللي متابعنا عارف كويس ف ليه طيب نلاقي ردود الأفعال عكسية؟!». وأضاف قصر الكبابجي: «على العموم مفيش أي هدف من البوست ده غير دعم المعلم صبحي كبيرنا واللي سبقنا في المجال بكتير ومحاولة لإخماد نار إشاعة ملهاش لازمة هتحطنا في مكان البيزنس مان الشرير بتاع المسلسلات اللي بيصحى الصبح يشرب سيجار كبير وهو لابس الروب على البدلة ويشوف هيأذي كام واحد النهاردة، كفاية دراما أرجوكم».