فتح إبراهيم سعيد، نجم الأهلي ومنتخب مصر السابق، النار، على شريف إكرامي، حارس مرمى الفريق الأول لكرة القدم بنادي بيراميدز. يأتي هذا بعد تصريحات الأخيرة التي هاجم فيها إكرامي نجوم الأهلي والزمالك السابقين، بسبب بعض تصريحاتهم في البرامج الفضائية. وقال إبراهيم سعيد، في تصريحات تلفزيونية عبر فضائية «النهار»: «شريف إكرامي، من حقه يتكلم ولكن يتكلم في الإطار بتاعه، يتكلم عن تدريباته، إنت قعدت نص ساعة عشان تكتب الكلام ده، كان ممكن تتمرن أحسن، على الأقل نركز في تدريبك وإزاي ترجع تلعب أساسي، إنما تدخل على السوشيال ميديا، وتزايد عليا وتزايد على أحمد بلال، مش هتخلص، ركز في شغلك أحسن». وأضاف: «خليك في الكورة لما تبطل كورة اتكلم زي ما أنت عايز، محدش هيقدر يلومك لكن دلوقتي ركز في تدريبك وشغلك إنت كنت قيمة كبيرة في حراسة المرمى فجأة مبقتش أساسي وفجأة مبقتش موجود وبعيد عن منتخب مصر وفجأة مش بتلعب في بيراميدز وفجأة مش موجود على الساحة، آخر سنتين أنا شايفك دكة، إنت موجود على الدكة بقالك سنتين». وتابع: «كل المدربين معندهمش ثقة فيك، يبقى ده تقصير من عندك إنت، إنت دماغك مشغولة وفرحان إن الناس بتتكلم عليك إنك دبلوماسي وبتتكلم كويس، الكلام ده حلو بعد ما تبطل لكن دلوقتي ركز في التدريب». وأتم: «الكلام ده اللي بيعملوه الناس اللي مبطلة علشان هما ناس فاضية معتزلين».