علق المهندس نجيب ساويرس، رجل الأعمال، على الانتخابات الرئاسية الأمريكية، كاشفًا عن مرشحه المفضل للفوز بين دونالد ترامب، وكامالا هاريس. وقال ساويرس في حواره مع «المصري اليوم»، إنه يرى أن دونالد ترامب سيكون الأفضل من الناحية الاقتصادية، متابعًا: «كامالا هاريس دي شيوعية، وبعدين منظرها ميملاش العين، هبلة وبتهبل». وأضاف: «مشكلة أمريكا إنهم كل مرة يجيبوا اثنين مرشحين قدام بعض أنيل من بعض، فأنت بتختار مين أقل نيلة من التاني». وتابع ساويرس: «أنا مش بحب ترامب، بس أفضل إنه هو اللي يكسب، لأن كامالا هاريس اشتراكية شوية، بتهبل، أنا مش بحب الحزب الديمقراطي؛ أوباما وبايدن..» وأكمل: «أي واحد هيجي هيقف مع إسرائيل، إسرائيل محتلة أمريكا، الناس مش فاهمة دي، أي حد بيقول كلمة حق تبقى أمه داعية عليه». وأوضح: «عشان كده مهم لما تجي تختار عدوك لازم تحسب مقدار قوته إيه؟! انت النهارده لما دخلت موت 1200 واحد منهم ستات وأطفال لازم كنت رد الفعل هيكون شكله إيه؟ لأن دي عالم مفترية، فانت مكنتش عامل حسابك ليه لرد الفعل». وتابع: «بعض الناس بتقول في مليون واحد مات في فيتنام، لكن ده مات وهو بيحارب! لكن أنت الأطفال والستات مجتش لهم فرصة للحرب، اتهدت البيوت عليهم».