كشفت تقارير إعلامية كواليس خاصة بطلب مارسيل كولر، المدير الفني بالفريق الأول في النادي الأهلي، تغيير مدير الكرة، خلال الاجتماع الذي عُقد مع رئيس النادي محمود الخطيب. وقال تقرير أذيع عبر قناة «النهار»: «الكلام انتشر في آخر 24 ساعة بشأن ملف خالد بيبو، اتكلمنا على مطالبة كولر بعودة سيد عبدالحفيظ من 4 و5 شهور، ودي عودة مش هتحصل». وأضاف: «الناس في النادي الأهلي قالوله الراجل لسة ماشي هيرجع إزاي؟، ابتدى الموضوع يبان إن كولر مش عايز خالد بيبو». وأكمل: «طبقًا للمناقشات الدائرة داخل الأهلي كولر أبدى رغبته من جديد برحيل خالد بيبو، والكابتن محمود الخطيب قاله احنا متمسكين بيه وجايب بطولات مع النادي». وتابع: «هل سيرحل بيبو عن منصبه كمدير للكرة في الأهلي؟ كولر قال ده مطلبي الوحيد على الصعيد الإداري، حاول كابتن الخطيب تلطيف الأجواء، وكان العامل الرئيسي في الشحن وإن العلاقة مش أحسن حاجة هو المترجم، ده ليس اتهام ولكن بقول المناقشات اللي بتدور داخل النادي». وزاد: «تم الاستقرار في النهاية أن يتم إرجاء اتخاذ القرار لما بعد عودة كولر من الإجازة ويكون الموسم خلص ومناقشة الأمر من جديد، وده اللي وصل ليه محمود الخطيب مع كولر ووكيله خلال الاجتماع». وأستطرد: «ممكن يرحل خالد بيبو وممكن يستمر، الموضوع لم يحسم، خلال الأيام الحالية لم يتم التطرق داخل الأهلي بخصوص بديل خالد بيبو، لأن مفيش قرار برحيل خالد بيبو بشكل رسمي. في رغبة عند كولر لكن مفيش قرار عند النادي لحد دلوقتي، وفي نسبة أعلى من نسبة، لكن هنتنظر المناقشات اللي هتحصل بعد عودة كولر من الإجازة».