وجه إبراهيم سعيد نجم الكرة المصرية السابق، رسالة إلى حسام وإبراهيم حسن، بعد تصريحات الأخير وانتقاده ل أحمد حسن نجم الأهلي والزمالك ومنتخب مصر السابق. وقال إبراهيم سعيد في تصريحات عبر قناة «النهار»: «نصيحة لكابتن حسام وإبراهيم حسن الجهاز الفني لمنتخب مصر، ممكن تسدوا ودانكم عن ما يقال، وكابتن أحمد حسن من حقه إنه يتكلم وينتقد، وله الحق إنه يتكلم في معلومات أي كانت صح أو غلط». وأضاف: «ليس من الممكن أن يرد كابتن حسام وإبراهيم حسن على كل الناس على كل الصفحات اللي بتنتقدهم». وتابع: «مش كل اللي ينتقدني على السوشيال ميديا أرد عليه لأن كده مش هنخلص، فسيب اللي يتكلم يتكلم طالما إنك مركز في شغلك، ولو أنت متهاجمتش مش هتنجح، ولكن الهجوم بيخيلك تبقى أحسن». وأتم: «رسالتي لكابتن حسام وإبراهيم حسن، لاتلتفتوا لكل مايقال وسدوا ودانكم، لأن عندكم مهمة صعبة كنتم بتسعوا لها من 2018، وهي تولي قيادة منتخب مصر». وشن إبراهيم حسن مدير منتخب مصر هجومًا لاذعًا على أحمد حسن في تصريحات عبر برنامج «ملعب أون تايم»، المذاع عبر فضائية «أون تايم سبورتس»، حيث قال: «أحمد حسن طالع بيتكلم في البرنامج بيقول (مفيش متابعة من الجهاز الفني لمنتخب مصر لمباريات الدوري الأخيرة)، بناء على إيه بيتكلم، هل إنت عايز تعلي البرنامج بتاعك تجيب سيرة حسام وإبراهيم حسن؟». وأضاف: «لازم يبقى في احترام وفي نظام، ولازم تحترموا كيان منتخب مصر ومنظومة الجهاز الفني المسؤولة عن المنتخب». وتابع: «لو عايز حاجة ابعتلي اسألني، لكن عايز تعلي فقرة في البرنامج بتاعك على حساب الجهاز الفني لمنتخب مصر!. للأسف هي ماشية كده». وأكمل: «احنا مش مستنيين حد يقولنا نتابع مين ونعمل إيه، إحنا عارفين بنعمل إيه، المباريات الأخيرة تقام في توقيت واحد، الجهاز المعاون بيعمل تقريره وبيرسله للكابتن حسام حسن». وأتم: «بطمن أحمد حسن، إحنا عارفين شغلنا كويس أوي، واحنا مشكلتنا إن حياتنا شغلنا، إحنا مش بنشتغل في بزنس وبرنامج وعضو مجلس إدارة كل ده في وقت واحد وماسك مدير فني، إحنا طول عمرنا متفرغين لشغلنا».