رد إبراهيم سعيد، نجم الأهلي ومنتخب مصر السابق، على تصريحات محمد عبدالوهاب، عضو مجلس إدارة الأهلي السابق كان محمد عبدالوهاب، قال خلال تصريحات فضائية في حواره ببرنامج «اللعيب»، المذاع عبر فضائية «إم بي سي مصر»: «كان في لعيب جامد جدًا في نادي الزمالك اسمه إيمانويل أمونيكي، كان كل ما يلعب قدام الأهلي يجيب جون». وأضاف: «أمونيكي مكنش ليه حل، جبناله عرض من الدوري الألماني، كان لازم يمشي من نادي الزمالك، ماينفعش كان يستمر في نادي الزمالك، هيفضل يعكنن على الأهلاوية ويجيب كل شوية فينا جون، فكان لازم يطلع برة». وقال إبراهيم سعيد، في تصريحات تلفزيونية عبر فضائية «النهار»: «أنا حزين من تصريحات محمد عبدالوهاب، أنا أحد أبناء الأهلي وحافظ فكر النادي الأهلي من خلال الأشخاص اللي اتعملت معاهم، اتعاملت مع الكبار في الأهلي بداية من عبده صالح الوحش ثم صالح سليم وحسن حمدي ومحمود الخطيب والكابتن طارق سليم والكابتن ثابت البطل، أنا اتعملت في الأهلي مع عقليات تتوزن بالذهب لأن الفكر بتاعهم يديك خبرات في الحياة وفن الإدارة وكيفية التعامل مع الأحداث». وأضاف: «هذه الأسماء كان لهم دورًا كبيرًا في وجود الأهل في هذه المكانة»، مضيفًا: «النادي الاهلي مش محتاج يفرغ نادي الزمالك، الكابتن صالح سليم، اعتزل ظهر محمود الخطيب وبعدها ظهر حسام حسن وعصام الحضري وأبوتريكة وعماد متعب، كل فترة تظهر أجيال جديدة في الأهلي». وواصل: «النادي الأهلي مش محتاج يفرغ نادي الزمالك، أنا لعبت في الأهلي من 97 حتى 2004 الأهلي لم يتعاقد مع لاعب زملكاوي على الرغم في تلك الفترة نادي الزمالك كان مليئًا بالنجوم» وأكمل: «لو في صراع على لاعب، الاهلي طبيعي هيدخل في مفاوضات ويتعاقد معه أخر حاجة، كان إمام عاشور تم التعاقد معه بشكل محترم، إنما اني اروح اتفق مع لاعب واطلعه كويري لأي نادي ده مش موجود في الأهلي». وأردف: «استحالة يكون الكلام ده حصل في فترة صالح سليم أو حسن حمدي أو محمود الخطيب، لأن الناس دي عقليتهم عقلية لاعب كورة وده بالصراحة اللي زعلني من تصريحات محمد عبدالوهاب». وأتم: «هو الأهلي فاضي عشان يفكر في تفريغ نجوم الزمالك، الأهلي بيركز دايمًا على المكان بتاعه عشان كده النادي الأهلي سابق وبيدخل البطولات بقلب جامد لأن هو مركز في المكان بتاعه».
