كشف الإعلامي أحمد شوبير حارس مرمى الأهلي ومنتخب مصر السابق حقيقة ما تردد في اليومين الماضيين حول رحيل خالد بيبو مدير الكرة في الأهلي عن منصبه وتعيين علاء ميهوب نجم القلعة الحمراء السابق بدلًا منه. وقال شوبير: «من إمبارح حاجة غريبة جدا جدا لغاية ما رحت اسأل فيها حد داخل النادي الأهلي يا جماعة الخير بمنتهى الأمانة أنا هحط نفسي مكان كابتن خالد بيبو اشتغلت من 4 شهور خدت كأس السوبر وخدت كأس مصر من الزمالك وخدت دوري أبطال أفريقيا والبطولة اللي اعتبر خسرتها هي بطولة السوبر من اتحاد العاصمة ولم يكن لخالد بيبو دخل في هذا الأمر». وتابع شوبير: «أنا لما ابقى قاعد وألاقي ترشيح فلان لمنصب مدير الكرة أنت لو مكان خالد بيبو وبتسمع الحاجات دي هتعمل أيه، ليه الحملة على خالد بيبو بالشكل ده، كمان في الأهلي عمرك شفته في نص الموسم بيغير مدير كرة مفيش مدير كرة بيمشي في نص الموسم وبعدين يمشي ليه من الأصل طيب ما كابتن سيد عبدالحفيظ فاز بكل البطولات ومشي، والناس بتحب سيد عبدالحفيظ عشان أصبح مدير كرة أسطوري زي ما كان كده كابتن ثابت البطل وكابتن حسن حمدي ففيه أساطير في عالم مدير الكرة بالأهلي». هل يخلف علاء ميهوب خالد بيبو في منصب مدير الكرة بالأهلي؟ وأضاف شوبير: «أيه اللي أنت عايزه يعني من كابتن بيبو مش فاهم يلعب فرقتين تقسيمة في تدريب الأهلي الفرقتين يكسبوا». واختتم شوبير: «النقطة الثانية الاسم اللي تردد وهو علاء ميهوب كابتن علاء مدرب كرة محترم وليس له تجربة إدارية سوى مودرن فيوتشر ولم تكتمل وخرج بنفسه وقال أنا لم يحدثني أحد في خلافة بيبو».
