رد إبراهيم سعيد، نجم الأهلي ومنتخب مصر السابق، على تصريحات محمد الشناوي، حارس مرمى الفريق الأول لمدة القدم بالنادي الأهلي ومنتخب مصر. كان محمد الشناوي، قال في تصريحات عقب مباراة منتخب مصر وبوركينا فاسو: «سعيد بثقة الجهاز الفني واللاعبين والجمهور في، بس أنا في حاجة مضايقاني من ناس كتير إن محدش قالي حمدلله على السلامة. الناس بتتكلم في مين هيلعب ومين مش هيلعب، المفروض لاعب كبير أو صغير لازم يكون في إصابة، لازم الناس تقوله حمدلله على السلامة». وقال إبراهيم سعيد، في تصريحات تلفزيونية عبر فضائية «النهار»: «أولًا يا شناوي، إنت من حراس المرمى التُقال، حارس مرمى ليك وضعك وليك تُقلك والناس بتحبك وبتقدرك، طبيعي الناس تختلف كل واحد ليه رأيه فمتزعلش، كل واحد ليه طريقة التعبير عن رأيه». وأضاف: «في ناس قالت الشناوي يلعب وفي ناس قالت كان مصطفى شوبير، إللي يلعب فدي متزعلكش لأن في الأول والأخر دي كورة وده منتخب مصر اللي راجع من فترة صعبة جدًا في كأس الأمم الأفريقية وإنت لسة راجع من إصابة وغايب منذ فترة طويلة وده شيء طبيعي فمتزعلش، إنت نجم كبير ومن الحراس التقيلة، الاختلاف في الأراء ده عادي متزعلش من حد ومتزعلش مني ومتزعلش من رضا عبدالعال، لأن في الأول والأخر كل واحد ليه رأيه». وأوضح: «أنا لما اتكلمت مخرجتش بره إطار الكورة سواء بتكلم على الجهاز فني أو اللاعبين، أنا الحمدالله بتكلم من وجهة نظري الكروية». وواصل: «كل واحد حر في رأيه زي ما أنا بحترم رأيك لازم تحترم رأيي، طالما أنا مغلطش فيك ومقولتش ألفاظ خارجة، محدش يزعل لأن في الأول والأخر الكورة كده وهي طبيعة الكورة كده، الكورة متعة واختلاف في وجهات النظر» وأتم إبراهيم سعيد: «الكورة لو مفيهاش الأحداث دي يا شناوي، مش هتبقى لعيب كورة ومش هنبقى حارس مرمى، الحاجات دي بتديك دافع إنك عاوز نظهر بشكل كويس وإنك عاوز تثبت وجودك وفي الأول والأخر هو مكسب لمنتخب مصر ومكسب ليك لما ترجع الاهلي».