حصلت «المصري اليوم»، اليوم الاثنين، على تفاصيل اعترافات المتهم الأول بقضية مقتل القائد العسكري اليمني، اللواء حسن العبيدي، على يد سيدتان ورجلان نسبت لهما النيابة العامة ارتكاب جرائم القتل العمد مع سبق الإصرار والترصد، والسرقة بالإكراه، وهتك العرض بالقوة، فضلًا عن اتهام المتهمة الخامسة بإخفاء المسروقات التي استولى عليها المتهمون من الأول حتى الرابعة ومن ضمنها مبالغ مالية وأسلحة نارية وذخائر. وإلى التفاصيل: اسمى/ رمضان محمد بليدى- 29 سنة- سائق س: ما تفصيلات إقرارك؟ ج: «اللي حصل إن أنا و(إسراء) متجوزين من حوالي 3 شهور واخدتها من الفيوم وروحنا قعدنا عند أهلها في البساتين، وبعدها بفترة أخذنا شقة في إمبابة وقعدنا مع بعض وفي يوم الأربعاء الموافق 14/12/2024، (إسراء) جت قالتلي إنها قابلت واحد سعودي وركبت معاه العربية وقالها أنا عايزك وعايز واحدة معاكي تيجوا بكرة تقضوا معايا ليلة، وساعتها قالتلي إن الراجل ده غني وإحنا ممكن نسرقوا وناخد فلوسه وقالتلي أنا هكلم أختي (سهير) وجوزها (عبدالرحمن) يساعدونا، وأختها تيجي على إنها البنت التانية قولتلها خلاص تمام، واتفقنا أنا وهي إن هي تديله منوم اسمه (كورزابيكس)، عشان الراجل ينام وهي تلم الحاجة اللي في الشقة هي وأختها ويأخدوا المسروقات وينزلولنا بمفتاح العربية بتاعة الراجل ونهرب بيها». وأضاف: «في يوم الخميس الموافق 15/2/2024 اتحركنا أنا و(إسراء) و(عبدالرحمن) جوز أختها، وأختها (سهير) وروحنا على البيت واتفقنا إن أنا و(عبده) هنفضل تحت و(إسراء) و(سهير) هيطلعوا البيت يدوا المنوم للراجل ويقلبوا الحاجة وينزلوا بمفتاح العربية وناخدها ونهرب بالمسروقات وفعلًا أول ما وصلنا عند بيت الراجل (إسراء) و(سهير) طلعوا وكان معاهم منوم وقعدوا عند الراجل في بيته نص ساعة، وبعدين أنا كلمت (إسراء) عشان اطمئن و(سهير) ردت عليا وقولتلها اديني (إسراء) قاتلي 5 دقائق بالضبط وهخليها تكلمك وبعد 5 دقائق فعلًا لقيت (إسراء) بتكلمني وبتقوللي الراجل كلم واحد صاحبه وهيجي اطلعوا معانا عشان تساعدونا قبل الراجل صاحبه ما يجي». تابع المتهم في اعترافاته: «ساعتها (إسراء) نزلت من الشقة بالمفتاح وطلعتني أنا و(عبده) في الأسانسير وأول ما دخلت شقة الراجل قام علينا وحاول إن هو يضربنا ويستغيث بالجيران اللي في العمارة، فأنا هجمت عليه وطلعت (المطواة) من جيبي ونغزته في إيده اليمين وساعتها أنا مسكته من رقبته قام عاضضني في صباعي فسيبته و(عبده) زقه وقعدوا على الأرض، وأول ما وقع قام (عبده) لف بقه بحتة قماشة عشان الراجل ميصوتش، وقام مكتف إيده اليمين في رجله اليمين، وأنا قمت مكتف إيده الشمال في إيده اليمين، وأنا ضربته بظهر (المطواة) في نص دماغه». واستكمل: «(عبده) قام مقلعه البنطلون عشان الراجل يسكت وما يتكلمش وفعلًا الراجل استسلم، وما اتكلمش فأنا سألته على مفتاح الخزينة وهو مكنش راضي يتكلم فأنا هددته إن إحنا هنصوره وهو عريان قام قايلي إن مفتاح الخزينة فوق الدولاب فسيبته وروحت جبت مفتاح الخزنة فتحتها و(عبده) كان قاعد عليه عشان الراجل ميصوتش، وأنا فتحت الخزنة واخدت منها فلوس مصري ودولارات وورق كان فيها، والبنات كانوا بيفتشوا الشقة وأخدوا منها شنط، وإكسسوارات كانت موجودة فيها، وبلاي ستيشن، ومكواه شعر، وأنا بقلب في الخزينة الراجل استغاث بيا وقاللي (عبده) بيضربني فأنا قولت ل(عبده) ميضربوش، إحنا أخدنا اللي إحنا عايزينه ويلا نمشي، وأنا أخذت مفتاح العربية ونزلت دورت عليها ولقيتها واستنيتهم قدام باب العمارة ونزلولي ومعاهم شنطتين سفر، وركبوا معايا العربية بتاعة، وروحنا على شقتي اللي فيإ إمبابة وطلعنا المسروقات في الشقة، واتفقنا إن إحنا هنقسم الفلوس بعدما نبيع التليفونات والعربية وبعدها أنا رجعت ومعرفتش اتصرف في الموبايلات ولا العربية وقسمت مبلغ 24000 ألف جنيه علينا إحنا الأربعة كل واحد أخد 6000 جنيه، وجمعنا من كل واحد ألف جنيه من ال6000 جنيه عشان نأخر شقة، وتاني يوم الصبح (عبده)، و(إسراء)، و(سهير) مشيوا وسابوا معايا 9 آلاف جنيه وفلوس الإيجار اللي إحنا جمعناها من بعض، وأنا ساعتها خدت الدولارات والفلوس الأجنبي اللي إحنا سرقناها وشيلتها في بيت (آية) اللي في بشتيل بس (آية) مكانتش موجودة، ولا كانت تعرف حاجة عن الموضوع خالص، وبعدها نزلت قعدت في الشارع شوية وروحت لقيت الحكومة موجودة في بيتي اللي في إمبابة، وقبضوا عليا وهو ده كل اللي حصل».
