علق الإعلامي تامر أمين على إعلان علياء بسيوني زوجة الفنان أحمد سعد طلاقها منه رسميًا عبر استوري حسابها على موقع «انستجرام». وانتقد أمين خلال تقديمه لبرنامج «آخر النهار»، عبر فضائية «النهار»، مساء الثلاثاء، أحمد سعد قائلًا: «إيه أخرتها معاك، وبعدين معاك يا أحمد، أحمد سعد طلق للمرة الرابعة، وخناقات أحمد سعد الزوجية أكتر من أغنياته، يعني ما بين أغنية وأغنية في يا جواز يا طلاق يا خناقة». وأضاف: «عايز أحمد سعد يهدى شوية في موضوع الجوازات والطلاقات، واحدة واحدة، إنت لسه صغير وفرمت أربعة، هي فورة، بالراحة اهدي شوية، خصوصًا إني توقعت إنه هيحافظ على علياء بالذات، لأنها كانت وش الخير عليه أوي». وتابع «أمين»: «من ساعة أحمد سعد ما اتجوز علياء، وهو يكح في أغنية تنجح، ربنا كان صارف له رزق إن كل أغنية يطلعها آخر سنتين تكسر الدنيا، فحد يبقى معاه واحدة وشها حلو كده ويطلقها». طلاق أحمد سعد وعلياء بسيوني وقالت علياء عبر «انستجرام»: «الحمد لله على كل شيء، تم الطلاق بيني وبين أحمد من شوية بناء على رغبته، وحابة أقوله شكرًا على قرارك اللحظي غير الموفق في خراب بيتنا وتدمير أسرتنا الجميلة اللي أنا حقيقي تعبت فيها لوحدي تمامًا وحاولت وعديت بمواقف مفيش حد في مكاني يقبلها عشان الأسرة دي وعشان المشوار اللي أنا ابتديته ومكنتش حابة انه ينتهي». وأضافت: «شكرًا على توقيتك الجميل وأنا قاعدة ببنتي 3 أيام وأنت مش عارف حاجة عشان مشغول الساحل وخروجاته وبعدها شغلك، أكبر شكر على المقلب اللي أنا اخدته في العلاقة دي واللي كنت فاهمة أن ليها قيمة وبضحي وبتنازل عشانها وأنت طلعتها ولا تسوي». وختمت قائلة: «ربنا معايا أنا وبناتي في اللي جاي وينتقم منك ويديلك على قد كل حاجة حصلت».
