كشف الشاعر تامر حسين، عن علاقته بالفنان عامر منيب، مؤكدا أنه يحتفظ بصورة البروفيل معه حتى الآن. وأضاف في لقاءه مع الإعلامية منى الشاذلي في برنامج معكم منى الشاذلي على قناة CBC: «قدمت مع عامر منيب أغنية جيت على بالي، لأنه كان وش الخير عليا وكانوا دايمًا بيقولولي لو اشتغلت مع عامر منيب، بكره تشتغل مع عمرو دياب، وهو كان بيستقبل المواهب زي عمرو مصطفى وأحمد على موسى وخالد تاج الدين ونادر عبدالله». وتابع: «عامر منيب كواليسه حلوة جدًا في الشغل، واشتغلت معاه ثلاث أغاني جيت على بالي، وحظي من السما كان اسم الألبوم». وعن سر صورته الشخصية مع عامر منيب الذي مازال يضعها بروفيل على موقع الفيسبوك تحدث عن هذا الأمر قائلًا:«عامر منيب كان دايماً يقولي عمرو دياب لو شافك هيشتغل معاك، أقرب وقت هيسمعك، هيمسك فيه، وبكره تشتغل معاه وتبيعني، وتتصور معاه، وكنا بنتصور يومها، وقالي خليك فاكر الصورة دي عشان بكره تتصور معاه وتبيعني». واستطرد: «وبعد وفاته حسيت إني مدين له بالفضل، فلسه محتفظ بالصورة دي كبروفيل على الفيسبوك لجد انهاردة مغيرتهاش، وعمري ما حكيت الموقف ده لعمرو دياب، بس الجميع عارف محبتي لعامر منيب».