قالت الإعلامية ياسمين عز، إن «جروبات السيدات أصبحت شبه قنابل موقوتة داخل المنازل، وكم من جوازات باظت وانتهت بسبب هذه الجروبات، واللي بيحصل فيها». وأضافت عز في تعليق برنامج «كلام الناس»، عبر قناة «إم بي سي مصر»: «إحنا متخصصين إننا نبوظ أي حاجة حلوة، الجروبات دي بدأت في الأول بإن واحدة بتسأل عن طريقة عمل المكرونة بالشاميل أو طريقة لتفتيح البشرة، أو تدخل في موضوع الدراسة فتسأل عن مدرس لابنها». وتابعت: «لكن فجأة وبدون مقدمات الجروبات دي خدت سكة تانية خالص، وستات كتير بقوا يعاملونها معاملة أمهاتهم، أمهاتهم في الحقيقة مش بيعاملوهم كده ولا بيحكولهم على التفاصيل دي! مش عارفة ليه ناس ربنا ساترها فتقوم فاضحة نفسها، يعني إيه تحكي اللي يحصل بينك وبين جوزك في أوضة النوم لستات متعرفهمش». وأكملت عز: «أعرف ستات بمجرد ما يكتبوا حاجة على هذه الجروبات تتأخد سكرين شوت وتتبعت لجوزها، وفي ستات معندهاش ضمير تلاقي واحدة شاتمة جوزها أو بتعيب عليها في حاجة تاخد الكلام ده وتنشره على فيسبوك عشان تفضحها». واستطردت: «مش عارفة إزاي حد بمزاجه وبمحض إدارته يكتب تفاصيل حياته الشخصية بالشكل ده على الجروبات، إيه المغزى من ده؟!».