كشف الإعلامي عمرو أديب، عن توقعاته لقرارات البنك المركزي خلال الفترة المقبلة، مضيفا: «المصايب جبر، والحلول اختيار«. وأضاف عمرو أديب خلال برنامج «الحكاية» والمذاع عبر قناة «إم بي سي مصر» أن البنك المركزي قرر مش هيرفع سعر الفائدة للمرة الثالثة على التوالي، معتبرا أن العاملين في البنك المركزي «مش بتوع صدمات»، حيث يرتفع سعر الدولار تدريجيا أمام الجنيه. وأوضح: «معندناش حد معاه عصا سحرية، أو يضربوا الأرض يطلعوا دولارات، مؤكدا: «محدش بيتكلم أن الدولار هينزل.. جايز بعد سنة نرى استقرار، هيفضل يطلع بالتدريج شوية شوية». وأشار إلى أن التفاؤل كلام كله جميل، معلقا: «أنا بالنسبة لي المسألة بسيطة جدًا إني أشوف حركة اقتصادية ونقدية في المجتمع تقدر تقف قدام الأزمة مش تحل الأزمة». لافتا: «أنا مش بتاع الكلام ده، مش هقولك بسيطة ولقيناها، لأ هي مش بسيطة ولا لقيناها، في العالم كله، محمد العريان في أمريكا مش سايب الفيدرالي، شايفهم متأخرين جدًا، بقالنا 3 أيام الاقتصاد الأمريكي مخبوط في الحيط». وتابع: «السؤال اللي في السوق وملوش رد واضح، هو الدولار الحقيقي يبقى سعره كام؟ حق ربنا يعني، هو حق ربنا الدولار قدام الجنيه يبقى بكام؟ إنت عامل حاجة جيدة إنت بتدرج في الزيادة، وعلى فكرة محدش بيتكلم إن الدولار هينزل، اللي بتسمعه هو هيعلى لغاية فين، أنا نفسي ينزل يارب يبقى التلاتة بتلاتة ساغ». وقدم عمرو أديب نصيحة للمواطنين عما يفعلون خلال هذه الأزمة، قائلا: «الحرص، بشويش يا جماعة، امشي عالقد وماتربطش نفسك بحاجة على المدى الطويل».
