هاجم مجدي عبدالغني، نجم الأهلي السابق، مسؤولي نادي الزمالك برئاسة المستشار مرتضى منصور، بسبب تجديد التعاقد مع أحمد سيد «زيزو» جناح الفريق الأول لكرة القدم بالقلعة البضياء بمقابل مالي كبير. وأعلن نادي الزمالك في الأيام الماضية، تجديد التعاقد مع «زيزو» لمدة 3 سنوات مقبلة. وقال مجدي عبدالغني، في تصريحات تليفزيونية عبر فضائية «الشمس»: «زيزو، هو أفضل لاعب في مصر حاليًا وأظهر مهارات عالية في الموسم الماضي، ولكن وأنا بتعاقد معاه أنا عارف إني هرجع الفلوس دي ولا الفلوس دي طايرة مني؟ تجديد عقد زيزو، بهذا المبلغ الكبير أمر غريب جدًا، الوضع الطبيعي في أي مكان في العالم حتى بلاد أفريقيا اللي هي بتصدر لاعيبة لجميع دول العالم، مبيتعقدوش كدة وخلاص، ينظرون للمقابل المادي كبير ولا صغير، أنا هقدر أدفعه ولا لا، وهتصرف في المبلغ منين، والوضع الطبيعى أنه سيحسب تلك الأمور قبل التعاقد مع أي لاعب، هيلاقي إنها مش ماشية معاه، هيقوله متشكرين حتى لو هو هيجبله (إكسير الحياة)، حتى لو هيجبله الدوري أو الكأس أو أفريقيا وجميع البطولات». وأضاف: «احنا بنعمل إيه في كرة القدم في مصر؟ إحنا بنعمل سمك لبن تمر هندي، إحنا بندفع تلك المبالغ حتى لا ينتقل اللاعب لأي نادٍ! ما يروح أي نادٍ، إيه المشكلة، العالم كله بيعاني حتى إنجلترا إللي بتدفع ملايين الجنيهات الإسترليني لديها مشاكل نفس الأمر في ألمانيا وسويسرا كل دول العالم عندها مشاكل، وهو إحنا مش عندنا مشكلة؟ احنا عندنا مشكلة، نقعد ندفع فلوس بالطريقة دي! الأرقام دي تطلع واحنا عندنا مشكلة إزاي! قولولي يمكن أنا مبفهمش». وأشار: «غصب عننا الأهلي قيد بيرسي تاو، على الرغم من أن اللاعب يعاني من إصابة مزمنة، فهو لا يرغب في الرحيل عن القلعة الحمراء، لو رحل سيطلب مستحقاته كاملة عن السنوات المتبقية في عقده».
