مظاهرات 27 مايو ومطالب الاجماع الوطني ======================== من الاول كدا اللي مش عايز ينزل مظاهرات يوم 27 مايو هو حر في نفسه بس دا ميديهوش الحق انه يقول لغيره لاء متنزلش ، عيب اوي لما تلاقي حد بيعمل حاجه وتقوله متعملش ، أنت حر في رأيك بس مش حر في إنك تفرضه على غيرك ولو اللى مش عايز ينزل علشان مطلب مجلس رئاسي اللي فيه ناس كتير ضده وانا منهم هو حر مينزلش مع انه يقدر ينزل ويكون ايجابي بحيث يزود عدد الناس اللي ضد المطلب دا وميخليهومش غالبين على الساحة اللي فيها مطالب تانية عليها اجماع وطني ومطلوبة ولسه متحققتش ودي اللى كلنا نازلين نطالب بيها لكن علشان انت رافض مطلب معين ومش عايز تنزل بسببه ودا حقك بس بردو انك متخليش غيرك ينزل فدا مش من حقك بصوا بقا يا جماعة احنا عايزين كدا نبقا ايد واحدة ونتوحد وكل واحد ييجي على نفسه شوية علشان خاطر البلد وادينا بنشيل بعض دلوقتي انا عارفة وناس كتير عارفة ان موضوع الاستفتاء دا من اوله لاخره حصل غصب عن ناس كتير ونتيجته طلعت صادمة لناس كتير بس هو دا شعبك وهو دا تفكيره حتى لو كان اتسيطر عليه من تيار معين بس التيار دا لقى صدى ليه قوي في الشارع والتيارات التانية معرفتش تروج لنفسها في الشارع صح فأحنا ياريت مش نهاجم رأي الشعب ورأي الاغلبيه علشان جت مخالفة لهوانا او هوى ناس معينه ومش نفرض عليهم رأينا بالقوة اومال ايه بقا معني الديموقراطية اللى كلنا بنادي بيها انا من الناس اللي قولت لاء في الاستفتاء بس لما طلعت النتيجة نعم جيت على نفسي وتقبلتها واحترمتها ومفيش اختيار تاني لان هو دا مفهوم الديموقراطية الصح اللى كلنا بنطالب بيه وارجع واقول انهم حتى لو استجابوا لتيار معين والتيار دا استخدم اساليب غلط فدا مش معناه اننا نعمل اقصاء جماعي لرأي الاغلبية دلوقتي الاغلبيه اللى اختاروا نعم واختاروا ان الدستور يتعمل بعد انتخابات البرلمان عندهم بعبع من حاجتين : مجلس رئاسي ولجنة تاسيسية لوضع دستور جديد قبل الانتخابات ويحق ليهم لانهم الاغلبيه اللى جابها الاستفتاء انهم يضايقوا ويحسوا ان في جهات معينه بتحاول تلتف على مطالبهم ودا اللى بيخليهم ضد المظاهرات ودا مخلينا كلنا متقسمين ومتفرقين ومش عارفين نستقر على رأي واحد بالنسبة للمجلس الرئاسي وأحب اوضح حاجه مفيش حد ضد نقد المجلس العسكري لانه مش فوق المحاسبة ولا المسائله ويحق لاي احد ان ينتقد سياساته الخاطئة لكن نقد السياسات الخاطئة للمجلس العسكري مش معناه مجلس رئاسي والموافقه عليه ممكن أفهم المجلس الرئاسي دا مين هيطرح اسمائه ومين هيعينه ولا مين هينتخبه ؟؟!! لو هو هييجي بالتعيين يبقا بردو المجلس العسكري هو اللى هيعينه يبقا معملناش حاجه ولو هينتخب يبقا في ظل الخوف من سيطرة تيار معين يبقا التيار دا هو بردو اللى ممكن يسيطر عليه بردو ونرجع نلف في دايرة مفرغة وبدل ما بننقد في المجلس العسكري هنقعد ننقد في اعضاء المجلس الرئاسي وهو احنا لو انتخبناه هننتخبه في اد ايه وهيقعد اد ايه و الانتخابات خلاص كمان 3 شهور والاغلبيه مش موافقه والجيش مش هيوافق ولا هيسمح بكدا وهندخل في صراعات أكتر ودا نفس الشئ بالنسبة للجنة التاسيسية اللى بردو فكرتها فيها متناقدات لو الناس اللي بتتطالب بلجنة تاسيسية منتخبة تحط الدستور قبل الانتخابات خايفة من سيطرة تيار معين على انتخابات مجلس الشعب اشعرفهم بقا ان ان التيار دا مش هيسيطر بردو ف انتخابات اللجنه التاسيسية الا لو فيه نية لاقصاء تيارات بعينها مجلس الشعب اللي احنا هننتخبه هيختار اللجنة التاسيسية دي ومش شرط تكون من مجلس الشعب نفسه بس انتخابات مجلس الشعب هتعبر اكتر عن واقع الشارع الحقيقي لكن اللجنة التاسيسية ممكن يحصل فيها اقصاءات ممن يسمون نفسهم النخبة أما التيارات الاخري اللي هما خايفين تنكشف قوتهم الحقيقية في الشارع في انتخابات مجلس الشعب ولو هما خايفين من سيطرة تيار غيرهم على الانتخابات ينزلوا يشتغلوا في الشارع صح ويعرفوا مطالب الناس ايه ويحققوها ويدخلوا دماغ الناس زي ما غيرهم بيعرف يدخل دماغ الناس ويعشش فيها وكفاية تلاكيك ياريت بقا نشوف الناس عايزة ايه ونشوف مطالب الاجماع الوطني ونحاول نقلل الفجوة اللى بينا دي بسبب المطالب اللى ضد رأي الاغلبية وياريت نقلل خلافتنا اللي فيه ناس كتير متسلقة ومن الثورة المضادة بيستغلوها علشان يضربونا في مقتل ويهموشونا ويحاولوا يتفهوا من أرائنا وقراراتنا خلوا مطالبنا موحدة الله يخليكوا وكل واحد ييجي على نفسه ويتنازل عن مصالح تياره الشخصي دول هما شهرين الصبر الصبررر. صفحة كلنا خالد سعيد على الفيس بوك عملت استفتاء على المطالب ودي كانت أهم مطالب كان عليها أجماع : 1- علاج مصابي الثورة على نفقة الدولة والتكفل بأهالي الشهداء 2- عمل قانون لمحاكمة بواقي النظام على الفساد السياسي لان مجرد المحاكمة على الكسب غير المشروع مش هينفع لان بعد التنحي بشهر ونصف اتقبض عليهم وكانوا خلاص ظبطوا نفسهم 3- عودة الشرطة فورا للعمل الجاد دون الاخلال بكرامة المواطن الشريف واشراف قضائي على جهاز الامن الوطني ومحاكمة المتورطين في قتل المتظاهرين ومحاكمة رجال الاعمال الفاسدين ومصادرة اموالهم 4- سرعة محاكمة مبارك واسرته وعدم التهاون في هذا الطلب والقضاء على كل رموز الفساد والمطالبة بالشفافية من المجلس العسكري حول كيفية ادارة البلاد والكف عن الغموض والتكتم 5- القبض على البلطجية واعادة الامن للمواطن المصري 6- الشفافية الكاملة ، معايير واضحة لاتخاذ القرارات والله الموفق والمستعان