وجّه الرئيس عبدالفتاح السيسي عدة رسائل لضباط وأفراد الشرطة، خلال كلمتة التي أعقبت زيارة مفاجئة، أجراها الرئيس، صباح الخميس، لأكاديمية الشرطة. وقال السيسي، إنه جاء إلى الأكاديمية لتوجيه الشكر لرجال الشرطة على ما قدّموه للوطن، مضيفًا: «أنا جاي عشان أشكركم وأقول لكم شهداءنا اللي لسه دمهم في رفح والعريش لسه منشفش، مهمتكم تقدموا حياتكم علشان خاطر بلدنا». وتابع: «أنا جاي أشكركم وأقولكم نتائج الانتخابات والتأمين عظيم وعدم التدخل في الانتخابات أمر مقدر جدًا، والرأي العام شايف الشرطة تقوم بالموضوع بمنتهى التجرد». كما بعث السيسي برسالة للضباط يؤكد فيها رفضه للتجاوزات، التي يرتكبها بعضهم، مطالبًا إياهم بالحفاظ على شعار «الجيش والشرطة والشعب إيد واحدة»، مضيفًا: «مفيش إنسان يبقى ماشي ويُمس، المواطن المصري أخوك، ويمكن يكون أكثر من كده كمان شوية». وأوضح الرئيس: «أي شخص يُخطئ داخل أي مؤسسة هيتحاسب، ولازم القادة الكبار يكونوا قدوة ومثل للضباط»، قائلا: «عايزين نرسّخ دولة القانون، دي مهمة صعبة جدًا، علينا وعليكم». وفي رسالة أخرى، طالب السيسي ضباط وأفراد الشرطة بالحفاظ على قيمة ما يقدمونه للوطن، قائلًا: «لازم تحافظوا على القيمة العظيمة اللي بتقدموها للناس، أنتم تقدمون مهمة عظيمة، عارفين يعني إيه المواطن يمشي في الشارع وهو آمن على حياته وعِرضه وماله». كما دعا الرئيس في كلمته رجال الشرطة ل«تحمل الضغوط»، وقال: «أنا عارف إن فيه ضغوط كتيير، يعني حجم الجهد المطلوب في ظروف بلدنا وضبط الموقف الأمني بشكل جيد، مع جهود مكافحة الإرهاب، فيه شغل كتير على كامل تراب مصر أنتم تقومون به، ضغط عليكم صحيح بس إنتوا أهل لكده، وتستحملوا قد الظروف دي 10 مرات، خلوا بالكم مصر متعلقة في رقبتكم». وحذر السيسي ضباط وأفراد الشرطة من «محاولة الإساءة وكسر الوحدة والاصطفاف، اللي اتحقق خلال الأعوام الماضية»، مضيفًا: «خلوا بالكم هناك محاولات لكسر وحدة الوطن والشعب والجيش والشرطة، إوعوا تفكروا الشائعات هتنتهي، كل الكلام ده لن ينتهي ونواجهه بمزيد من التلاحم». وتابع: «نحتاج لمزيد من نكران الذات والتضحية والعطاء، وطول ما إنتوا موجودين والشعب واعي وفاهم خلوا هدفكم الأكبر الحفاظ على مصر، إحنا بنتعامل مع المسألة بإخلاص، وبأمانة وكمان بشرف إن شاء الله».
