انتقد الإعلامي سيد على، مقدم برنامج «حضرة المواطن» على قناة «العاصمة»، أجهزة الأمن بسبب طريقة القبض على المهندس صلاح دياب، مؤسس المصري اليوم، ونجله توفيق، بتهمة حيازة سلاح بدون ترخيص. وقال «علي» في برنامجه، الأحد، «يا سيدي هو مُتهم وأخطأ، واعمل اللي عايز تعمله، ولكن إيه حكايات جيمس بوند، مش قادر أفهم ايه اللي بيحصل، وتصويره بالكلابشات، بصراحة الجهة التي قبضت عليه مش محترفين أمن ولا سياسة». وأضاف «عايزين تقولوا ايه من طريقة القبض عليه؟، ايه الرسالة اللي عايزين تبعثوها للاستثمار الخارجي، أنا أختلف مع صلاح دياب ولكن الطريقة دي لا تخضع لدولة القانون». وتابع: «الأمم تقوم بالعدل مش بالظلم، إيه الرسالة اللي الدولة عايز تبعتها للإعلام والمستثمرين بالقبض على صلاح دياب، عايزين توصلوا رسالة إيه، الناس متحملة الرذالة والتلقيح، من غير أي حاجة، ولكن (ائتلاف الدببة) بيكبر كل يوم، وبيسيء للدولة».