بعض المسئولين السابقين تتم محاسبتهم, ومش كلهم ومحدش يسأل ليه علشان تقريباً الحاجات دي حتفضل من أسرار الكون زيها زي سر مثلث برمودا والهرم والحاجات الغريبة دي, بس في حاجه اتسرقت لازم يتحاسبوا عليها وعلى رأسهم وإن لم يكن الوحيد طبعاً هو حسني بيه مبارك, اللي اتسرق وصعب يرجع هوه البسمه اللي سرقها مع زبانيته وكرامتنا اللي راحت, طيب ممكن يرجع أملنا في الدنيا؟ ممكن يرجعلي فرحتي؟ طيب بلاش دي ممكن يرجعلي الهوا نضيف شوية؟ طيب بلاش دي كمان ممكن يرجعلي شعر راسي اللي طرطأ أبيض من عمايله؟ طيب يا ترى حتعرف تخلي الظابط اللي اتوحش بسببك يقدر يرفع راسه تاني ويقول أنا راجل شريف؟ أبويا اللي جاله السكر والضغط من اللي شافه بسبب سيادتك وعمايلك حتعرف تعالجه؟ أمي اللي دمها اتحرق وروحها ماتت لما شافت بنتها بتموت قدامها وهيا صغيرة وكانت بتخطط لفرحها تاني يوم, حتعرف ترجع بنتها تاني؟ حتعرف تنسيها اليوم ده؟ الشاب اللي كان بيصلي في الجامع وهوه طالع اتمسك ودخل أمن الدولة طلع بعديها بشهور وعينه في الأرض (خمنوا ليه) حتقدر تخليه يرفع راسه تاني؟ أخويا وهوه متخرج جديد ومبسوط وجايب تقدير محترم ومتخيل إن كل الشركات حتجري عليه, فضل شهر واتنين وسنة واتنين مش لاقي غير وظايف عبيطة أحسن واحده فيهم وحشة. وكل ده بسبب فسادك وعلشان مش معاه واسطه, حتعرف تغير خيبة أمله؟ ياااااااااااااه حتقدر تعمل ايه ولا ايه , ولا تصلح ايه ولا ايه, ده البلاوي كتييييير والمظلومين اكتر والمتهانين أكتر وأكتر , لو عرفت تعمل واحدة بس من دول أنا مسامحك يا سيدي.