أولنا في لسة الجولة ورا جولة دة سوس بينخر يا ابويا في جسد دولة ايوة الملك صار كتابة انما ابدا لو غفلت عينا لحظة يقلبوا العملة الأبنودي يا شعب مصر بيخيروك بين النظام البائد وتعديلاته وبين ثورتك ومطلبك بدستور جديد يا شعب مصر العظيم .. اعرف أن اللي طلب تعديل المواد دي بعينها وساب بقية الدستور المعيب بكل مواده اللي تخلي كل رئيس جاي .. مبارك واللي تخلي كل رئيس جاي فاسد " فالصلاحيات المطلقة مفسدة مطلقة " وكرسي الديكتاتور وصلاحياته المطلقة .. هو من يصنع الديكتاتور وهذا هو دستورنا القديم - دستور 1971 – بساداته ومباركه اللي عايزين يرقعوه واذا كانت الثورة أسقطت الديكتاتور مبارك فالتعديلات التي لم تقترب من مواد صناعة الديكتاتور في الدستور القديم ستأتي بديكتاتور جديد .. بمبارك جديد من رحم النظام البائد مبارك جديد ليس بعجوز كمبارك القديم أستوعب درس الثورة جيداً سيُأمن نفسه وكل رموز النظام الفاسد وسيأمن عدم رجوع أموال مصر المنهوبة ولن يخرجهم فقط الخروج الآمن بل سيعمل بكل الوجوه غير المحروقة من الحزب الوطني الفعال جدا الآن والذي يشتري مقرات جديدة .. وينشيء أحزاب جديدة بأسماء ثورية مستعارة هو الذي سيحكم مجدداً مع تيارات أخرى لديها تقاطع في المصالح معه والذي يعيد ترتيب صفوفه وأوراقه بعد مفاجأة الثورة التي لم تكتمل وسيجفف منابع الثورة ومنابع كل القوى الثورية التي لم تروض ولم تهادن ولم تستأنس ولن يحاكم قتلة شهدائنا .. ولن يحاكم ولن يحل أمن الدولة بحق بل سيلبسها قناع آخر حيث حربائية المرحلة الآنية والقادمة وسيصدر قانون لمكافحة البلطجة ليحاكم به الثوار السلميين والثورة السلمية ولهم في قانون الطواريء أسوة حسنة ولتعلموا لماذا رفض طلب الثورة الرئيسي بعد سقوط مبارك بعمل مجلس رئاسي مؤقت يحاكم النظام البائد ويؤسس النظام الجديد لدولة المؤسسات ودولة القانون المحايد وكان هذا هو الحل الوحيد الثوري الذي يقطع كل السبل الرجوع للخلف .. للنظام القديم لكي نقطع كل حالات الفر والكر من هذا النظام الفاسد على الثورة والثوار بالتفافات وهمية من نوعية : ايه مطالبكم ؟؟ طيب نكلم مين فيكم ؟؟ عايزين حد نتفاوض معاه طيب خلاص.. نتفاوض مع الشباب البريء الطاهر لا .. المطلب بتاع مجلس رئاسي مؤقت صعب جدا وخط أحمر !! والمطلب بتاع دستور جديد ده برضه صعب جدا وخط أصفر !! لكن المطلب بتاع حكومة تكنوقراط ده مطلب زي العسل وعندنا كمان واحد تكنوقراطي مأصل اسمه أحمد شفيق خدوا بالكم يا شعب أن أحمد شفيق هو رئيس الوزراء اللي اختاره مبارك ولأن مصر أم العجايب والمعجزات تبقى مصر هي الدولة الوحيدة في العالم اللي رئيسها المخلوع بثورة هو اللي بيختار رئيس وزراءها بعد نجاح الثورة !! ويعمل تفاوض مع الشباب البريء الطاهر مش مع المطالب ويترك شفيق موقعة الجمل ومسيرتها المسلحة من الهرم إلى التحرير بناء على توجيهات سيادة الرئيس وثالوث رجاله ولأن التفاوض مع الشباب غير خالص التفاوض مع المطالب الشباب ياخد ويدي لكن المطالب بتأمر الشباب لما نقوله مجلس رئاسي مؤقت ده خط أحمر .. هيسمع الكلام أصل الشباب مؤدب وبيحترم الكبير ولما نقوله الدستور الجديد هياخد وقت علشان كده هنعملك ونظبتلك تعديلات تخليك تلعب سياسة وانت مبسوط وفرحان هيوافق علشان الشباب بيتخنق بسرعة وعايز ينجز من الآخر ولأن مصر أم العجايب والمعجزات مبارك برضه ورجال نظامه البائد الديكتاتوري اللي قهر وسرق وعمل ما لا يعمل في المصريين هما اللي اختاروا المواد اللي عايزينها تتعدل مش الثورة لأن الثورة كانت يا عيني عايزة دستور جديد .. وطلع الطلب ده مش موجود في مطبخ النظام البائد ! طلع المطلب ده مستحيل .. زي الغول والعنقاء والمجلس الرئاسي المؤقت فقال لشباب الثورة اتصبروا بالتعديلات دي سنة ولا حاجة والدستور الجديد من العين دي قبل العين دي في الموسم القادم وأبقوا معانا وشيل ايدك من على الريموت كنترول وأوعى تغير محطة الثورة وتفوتك عجايب مصر !! وكل الإعلام بتاع النظام البائد الفاسد .. الناهب .. الحاقد .. العاجز .. المضل عمال يكذب ليل نهار تحت سمع كل العالم وكل الثوار من الشباب البريء الطاهر وعمال يلبس كل المصايب للثورة وللثوار مرة كأن المظاهرات في ميدان التحرير المليونية هي اللي خربت مصر .. وهي اللي مسئولة عن بلطجية الحزب الوطني اللي شغال ب nickname .. وهي المسئولة على وقف المرتبات .. وهي المسئولة عن الحظر .. وهي المسئولة عن زلزال اليابان .. إعلام مزيف إلى الدرجة القصوى وكل ده قال ايه ثورة احنا ثورة مع ايقاف التنفيذ أمال لو مش ثورة ومكناش نجحنا في إسقاط الرئيس كنت عملتوا فينا إيه وفي مصر إيه ؟ طيب زعل الشباب البريء الطاهر وعمل مليونية وراها مليونية علشان يسقط شفيق يا راجل يعني اسقطنا حسني مبارك الرئيس الديكتاتور في 18 يوم وأسقطنا أحمد شفيق رئيس الوزراء في تلات اسابيع شوف ياجدع حكمة ربنا وعجايب ثورتنا احنا وتونس .. وغنوشي تونس .. وشفيق مصر طيب اقعد قعد الشباب البريء الطاهر برضه يتفاوض ويطلب إنهم يشيلوا ألضو ويحطوا شاهين قصدي يشيلوا شفيق ويحطوا عصام شرف رجل من الميدان حيث المعركة الوهمية والتي أبعدتنا أميال عن مطالب الثورة الرئيسية حيث وضع العربة أمام الحصان الثوري خدوا بالكم الشباب البريئ والطاهر وكل المصريين واللي قروا اللي أنا كتبه من الأول والكل كليلة .. نسوا طبعاً في دوشة شفيق يا راجل والتعديلات ضد الثورية نسيوا إن مطالب الثورة الرئيسية والبديهية هي : مجلس رئاسي مؤقت ثوري ودستور جديد وكانت المفاجأة أنه أتى عصام شرف بس رموز النظام البائد طلقاء .. شرفاء .. أمراء يديروا كل المطابخ من إعلام بيحارب الثورة بإبتسامة صفراء وبقناع مكتوب عليه 25 يناير لبلطجية في الشوارع .. لهدم وحرق كنايس .. وسرقة بنوك واختفاء الملفات الحقيقية من أمن الدولة التي تدين النظام وترك الملفات الهامشية البروباجاندية التي تصنع الإشاعات وتلهي الشعب المصري في مين كان مخبر ؟ ومين فنان كان له ملف ؟ ومين من النشطاء كان له ملف ؟ كل واحد طالع بملفه لتفريغ الحلة البريستو الثورية من مضمونها وقوتها وأهدافها وثوريتها وبلع كثير من الشعب المصري الطُعم وبلعت بعض من القوى الوطنية الطُعم وبلع الإخوان كل الطُعم بمزاجه .. طُعم التعديلات الدستورية اللي هيخلي البلد زي الفل والعجلة تدور والأمن يرجع الجيش وبعض من الشعب والشرطة والسلفيين والإخوان ايد واحدة ويتم ضرب مصر في قلبها الثوري ويرتبوا للإنتخابات القادمة بكل جد ونشاط باهر ليحتلوا الكرسي الرئاسي ومجلس الشعب ومجلس الشورى وتضيع مصر مرة أخرى ملحوظة مُلحة : الثورة المصرية طبعا .. ثورة مع ايقاف التنفيذ والمصيبة ان الثورة لو بس خلصت على كده هنكون بس زحنا جمال مبارك وبعبع ومخطط التوريث وده مكنش بس هدف الثوار .. ده كان كمان هدف لناس في النظام لجناح في النظام لسلاح في النظام وهنكون قدمنا مصر على طبق من دهب لمن يهمه الأمر ويمتلك تنفيذ الأمر وساعتها مفروض نراجع شعار الثورة الرئيسي ( الشعب يريد اسقاط النظام ) ونخليه ( الشعب يريد اسقاط الرئيس والتوريث .. وبقاء النظام ) تحذير للثوار .. لو تمت التعديلات زي ما طبخها النظام اعرفوا إنكم اتحاصرتوا بين فرعون وديكتاتور جديد وراكم وبحر مؤامرات وتكتيكات النظام قدامكم يا ثوار مصر احذروا .. يا ثوار مصر اتحدوا فهذه اللحظة هي أخطر الأوقات في ثورتنا إما نكون أو لا نكون أما تكون مصر أو لا تكون