على طول الحياة وعرضها نصادف كائنات حية، وأحياناً نصف ميتة، منهم مَن خاب فيه الظن، ومنهم مَن جاء بأجمل مما كنا نظن، ولأنهم فى بداية الأمر ونهايته سواء كانوا أحياء مرتزقة أو موتى على قيد الحياة مجرد رسوم متحركة من «ماء عَكر» تحركها الغاية، وتركيبات صلصالية من «طين مِطيّن» تعجنها الوسيلة، فلا يصح يا أبناء المحروسة الكرام أن نرهق طاقتنا فى استنهاض نخوة هؤلاء وأخواتهم، لأن أغلبهم والذين على شاكلتهم لا يتغيرون مهما حاولنا، ولا عجب فى ذلك، إذا كانت السماء بجلالة قدرها تصب فى البحر ماء عذبا ومُقطرا، ورغم ذلك يبقى مالحاً، فماذا نحن بفاعلين مع معشر بجم من الجنس الثالث (كطرف) والعنصر الخامس (كطابور) الذين يمشون على أيديهم وأرجلهم معاً بكفوف دموية وأقدام ملتوية؟ مزايدين مدعين البطولة قولاً وفعلاً وهم فى الأصل فَكّة مضروبة، عيار فالصو، تقضى العمر بأكمله متنقلة بين الجيوب عَلّها تحصل على فوائد أو عوائد من كل حاجة وأى حاجة. طبعاً أقطع دراع أبوشامة وعلامة من لغاليغو إن كان حد فيكو فهم حاجة م اللغوى اللى رصيته فوق ده، أصل الحوار ع المتغطى عدم اللامؤاخذة، لكن قاصد كائنات سَوّ بعينهم وجبايرهم، ومع ذلك بما أن الكاتب لازماً ومن كل بُد يوصل لأمخاخ الكل نفر.. نفر، من غير فذلكة فارغة يبقى نقول بالبلدى عشان تقفش ف الدماغ شوفوا يا ولاد بلدى، الدنيا دى فيها ابن الحلال المصفى وابن الحرام المصدى، ولاد الحلال يتعدوا ع الصوابع اللى بتلعب، إنما ولاد الحرام، أعوذ بالله، على قفا من يشيل ودول بأه اللى عليهم القصد والنية ف المقال، إكمن فيه بتاع عشرة.. خمستاشر.. قول تلاتين قرد بيتنططوا ع الحجر شمال ويمين، اللى حاوى بكلامه المعسل، واللى بهلوان فى حركاته القرعة، واللى مأنتم مع جيران الشوم واللوم وش كده ولا يستحى وجبلاية القرود دى مقضيينها لعب على كل الحبال وده راس مالهم وموسم السبوبة بتاعهم، وماله كل غاوى بشوقه، اللى بيشيل حكومات مخرومة أو قنوات مشبوهة أو إخوانجية مُقنّعين فى زى سلفيين وديعين بديعين أو دساتير مرقعة، بتخر على راس اللى خلفوه، لحد كده عال العال مدام كل منّا ف حال سبيله، إنما اللى عار العار أنهم يجرجرونا فى سكة الندامة ونتورط كلاكيت تانى مرة ونلبس كما لبسنا قبل كده حكومة جاية من بعد ثورة تصحيح شبه حكومة شرف، وقنوات مفتوحة ع البحر التركى شبه اللى تم إغلاقها من قبل بعدما ثبت ميلها التحريضى، ودستور جديد بأثر رجعى هوّ هوّ اللى تم إسقاطه لأنه إخوانى / سلفى الأصل والفصل، إحنا بنلف وندور على بعض ليه؟ إيه فكرة أنهم يجيبولنا بوصة ويلبسوها عروسة أو يبصموا بالعشرة إن الحداية بتحدّف كتاكيت، للدرجة دى إحنا ف نظرهم بقر ولسه ياما هنتحلب؟ وياترى على كده كم واحد لسه لابس طاقية الإخفا وبعد شوية هيبقى ظاهر زى عبدالظاهر؟ حتى الكورة ماخليتش من التطرف، زمان كان التعصب كروى، دلوقتى بقى مُرساوى. كده بقى يبقى طبّلت، ومدام الأهلى قلب أحمر بخطين بيض والزمالك قلب أبيض بخطين حُمر فقلب الربعاوية أصفراوى بأربع صوابع سود يا ناس هى ناقصة ألتراس بلاك نايتس؟! هو إحنا اللى هنقوله نعيده واللى نعيده نزيده ما نشيل ده عن ده يرتاح ده من ده، بالنسبة للمؤمن الذى لا يلدغ من جحر مرتين.. أخباره إيه؟ تانى هنجوز عتريس لفؤادة، مش برضه الجو ده باطل، تانى هنقوم حاميها مع حراميها فى قفة واحدة من غير ودان، تانى هنخلى الأبيض ف إيد الأسود.. إيد واحدة مافيش جدع ابن حلال مصفى يحطنا فى نور عينه ويلم الليلة السودة دى بتوابعها ونبتدى معاه من أول وجديد على نضيف بدل ما إحنا عاملين نتخبط فى عاهات نفسية على غير هوانا وهويتنا، مش برضه واجب نفصل الحابل عن النابل منعاً لاختلاط الأنساب وتفادياً لانتشار عدوى الفساد.. أظن وصلت صحيح أن كلنا بنى آدم، لكن ليس جميعنا يستحق لقب إنسان، لقد خلقنا الله أحراراً لا تابعين، ووهب لنا قلوبا نقية للاسترشاد، وعقولا مستنيرة للتوجه، وهذا ما يميزنا عن ذوات الأربع...!!
