يا بر مصر هواك في قلبي طارح شجن وأنا خايف لأموت م الحصر وقدامي عرضي بيمتهن أنا مش عويل ولا عنتيل ولا عمري كنت بخاف م المحن بس أنا أصل سيفي غصب عني من زمان جوه الجراب إتسجن ومكتوب على جبينى غريب مع إني عايش على أرضك يا وطن ********************** ويا ما ضهرى شال م الجبال صخر وحجر ورمل وتراب م القنال والسد وأنا إللى غرست ف قلبك يا بارليف العلم أنا نمرة ف ملف على كف القدر غلبان وعايش على قد حالي وقوت عيالى قصاد عنيه بيندعك تحت رجلين الغجر أخرس ولساني فصيح ومش قادر أنطق أو أصيح وإن صرخت..!! صرختي حشرجة ف قلبي الجريح بالع ترس مع إنى ف البلاغة فارس على ظهر فرس لكن مكتوب عليه السكات والخرس محسوبكم أهله فطموه من صغره على مقطف زلط لا يقدر يقول صح ولا يقدر حتى يقول حتى غلط **************************** أنا إنسان مجهول الهوية بلا عنوان متوايا آخر النهار رصيف جوه حارة أو حوش فى تربة ناس إمارة وإن ضربت عيليلوى تبقى المنامة في عشة فراخ على ظهر عمارة شريف.. عفيف ..نضيف وجيبي أنضف م الصينى بعد التشطيف وصابح على باب الله ولافيش في جيبي ولا حتى حق الرغيف ************************** ياخلق يا هوه..!! عرابى قال من زمان كلمته: ماحناش عبيد ..ومن فجر بكره يا بلد راح ينولد يوم جديد ولو إن رقابنا لسه فيها الطوق الحديد مع إننا أحرار عن أمنا وعمرنا ما كنا ف يوم عبيد لكن رقابنا لسه فيها الطوق الحديد وبورثونا من سيد لسيد مع إننا أحرار عن أمنا وعمرنا ما كنا ف يوم عبيد ****************************** يا بر مصر هواك في قلبي طارح شجن وأنا خايف لأموت م الحصر وقدامي عرضي بيمتهن أنا مش عويل ولا عنتيل ولا عمري كنت بخاف م المحن بس أنا أصل سيفي غصب عني من زمان جوه الجراب إتسجن ومكتوب على جبينى غريب مع إني عايش على أرضك يا وطن