هو أنت مش مصري ؟ وشياكة وعصري وواد كوول كدا وبتحبها ولا مابتحبهاش هي اه مجروحة حبتين ومحتاجه قطن وشاش وشوية مكركروم وأي مسحوق هدوم ينظفها من الزبالة اللي جواها والمشكلة مش فيك المشكلة في اللي رماها بس معلش خليك معاها روح وخليك وراها خلي علمها يرفرف في سماها * * * طيب هو أنت مش مصري ؟ وشياكة وعصري وواد كوول كدا وبتحبها ولا مبتحبهاش؟ ولا يعني لما نلاعب كوت ديفوار تبقى الدنيا قايدة نار ونبقى واقفين في الشوارع رافعين علمها بالليل وبالنهار ونزل إمتى العلم يوم ما تغلا الأسعار * * * طيب هو أنت مش مصري؟ وشياكة وعصري وواد كوول كدا وبتحبها ولا مبتحبهاش؟ معلش يمكن عدا عليك القطر ومجاش وقست عليك في حاجات كتير دفعت تمنها ببلاش بس معلش سامحها خليها على ربك ومتأنبهاش يمكن الظروف اللي غيرتها اه الظروووف .......ا الصيف والشتا وتغير الميعاد والفساد وزحمة الشوارع والبيوت والعربيات وأخلاقنا وضميرنا اللي مات صح ولا أنا غلطان حد يرد إن كان زعلان ؟؟ محدش يعني هيرد عليا ويشيل عني الحمل شوية طب على فكره أنا مش لوحدي ومعايا ناس كتير راجعين.. جاهزين.. حاضرين.. مستعدين.. وناويين على التغيير رافعين إيدينا لربنا وبنقولوا آمين وتاني مرة لما تشفونا بندعي ترفعوا أيديكوا معانا وتقولوا... آمين فاهمين يا مصريين