لو بكينا أو شكينا ولا روحنا ولا جينا لو ميتين مجلس عقدنا قلنا فيه غزة فى عنينا لو عملنا ميت مظاهرة (ليفنى) راح تضحك علينا بعد ما رمينا سلاحنا واتنزع من كل سينا بعد ما سلمنا سيفنا ودرعنا واللى فى إيدينا بعد ما سلمنا غازنا ودمنا للى معادينا ليها حق إسرائيل كل لحظة تغير علينا لو بكينا أو شكينا وانتقدنا إسرائيل لو لمجلس أمن سافر أبو مازن ألف ميل لو أخد صور الدمار لو أخد ألفين قتيل لو أخد أشلاء ولادنا وخد معاه مليون دليل مش هيلقى حد يسمع للى نام جيل بعد جيل اللى لسه بلاده نايمة حكمها ملهوش مثيل مستحيل الدنيا تسمع للتنابلة مستحيل لو بكينا أو شكينا همنا لكل الشعوب لو نشرنا صور لغزة أو صور كل الحروب الشعوب راح تعمل إيه للى مليان بالعيوب اللى نام والدنيا صاحية وعاش على اللقمة يادوب واللى ساب ثرواته تهرب من شرايين القلوب واللى بيصدق زعامة عششت فيها الذنوب دكتاتور ورا دكتاتور قتلوا أحلام الشعوب لو بكينا أو شكينا أو شجبنا مش كفاية مش كفاية تقف لمدفع تحدفه بطوبة وعصاية مش كفاية تعيش فى دولة حكمها ملهوش نهاية مش كفاية اقتصادك يبقى مرهون بالجباية أمننا تاه من إيدينا لما تاهت البداية لما نمنا على الكراسى لما صبح الحكم غاية هى دى بداية فشلنا والهزيمة والنهاية